Khawzawla Covid-19 kaihhnawiha Duty-te haw lo tura ngen an rêl

Nimin khan Khawzawl district bawrhsap Zo­than­mawia hoin DC pisa conference hall-ah Khawzawl District Task Force on COVID-19 an ṭhu a, Covid-19 No Tolerance Drive kalpui mek leh Krismas hunpui thleng tura hmalak dan turte an sawiho. Sorkar hnathawk Covid-19 kaihhnawiha mawhphurhna nei, Khaw­zawla awmte chu an khuaa haw lo tura ngen an rêl.

Ṭhutkhawmah hian, hunpui thleng turah hâlpuah leh hâlmawi lam chite Khawzawl district-ah khap ni se an ti a; Covid-19 No Tolerance Drive neih meka duty sorkar hnathawk, khaw dang aṭanga Khawzawla awmte chu hunpui laiin an khaw lama haw lo turin ngen ni se, an ti bawk.

Zothanmawia chuan, Covid-19 lên tirh aṭanga Khawzawl district-a task force hrang hrangte hmalakna chu fakawm a tih thu sawiin, "Covid-19 No Tolerance Drive hman meka dan bawhchhia man an tam chhan chu Khawzawl district mipuite'n dan an zawm ṭhat loh vang ni loin, duty-te thawhrim vang a ni," a ti a; an district-ah hripui vei mi 22 an awm tawh a, chu'ngte chu state páwn aṭang lut vek an nih thu a sawi.

Ṭhutkhawmah hian Khawzawl SP PC Lalchung-lura'n hunpui thleng tura YMA branch hrang hrang leh police-te'n Khawzawla hmalak dan tur an ruahmante a tarlang.

Khawzawl SP tarlan danin, Khawzawlah hian December 21 aṭanga January 3, 2021 thleng veng hrang hrangah police leh YMA branch hruaitu, mi 10 aia tam lo zanah an duty ṭhin dawn a; Khawzawl Hospital-a thawkte chu ni khatah darkar 24 chhung duty an insiam dawn a ni.