Congress party-in dodal dawn

Mizoram Pradesh Congress Committee (MPCC) chuan thuchhuah siamin, BJP kaihhruai sorkar laipuiin hnam tênau leh hnuaihnung zawkte tana reservation awm ṭhin tihbo tuma hma an lak avangin February 14, Zirtawpniah Vanapa Hall-ah duh lohna an lantir dawn tih an puang.

MPCC chuan, BJP kaihhruai Central sorkarin India rama hnam tênau leh sakhaw tênau zawkte nèkchêp tumin nasa takin hma an la mek zel tih an sawi a, "Tuna India ram puma Scheduled Tribe, Scheduled Caste leh OBC (Other Backwared Class)-te'n sorkar hna lakna hrang hranga reservation kan neih ṭhinte tihtawp tumin hma a la mek a ni," an ti.

Congress party chuan, "Hindu lal ram din tuma BJP-in hma an lak mekna leh hnam tênau zawkte'n hamṭhatna kan neih ang angte nuaibo tuma hma a laknate hi nasa takin kan dodal zel dawn. Congress sorkar hnuaiah hetianga hnam leh sakhaw tênau zawkte zalenna rahbehsak tumna hi a awm ngai lo," an ti a; reservation tihtawp tumna dodalna chu thláwp turin Mizoram mipui an ngen a ni.