Duhoma venhimna khauh zawk pe turin Mizoram sorkar ngen

ZPM Southern Headquarters, Lunglei chuan thuchhuah siamin, tunlai boruak thlirin, ZPM Legislature Party (ZLP) leader Lalduhoma'n venhimna ṭha lehzual a mamawha an hriat thu an tarlang.

Lunglei ZPM chuan, "Anti Defection Law hmanga a rem lo chunga MLA a nihna bàntir tuma hêkna leh beihna tâwk mek Pu Lalduhoma chu a taksa himna thleng pawha derthâwng thei niin kan hria a, hei vang hian venhimna uluk zawk pe ngei turin sorkar kan phût a ni," an ti.

Lunglei ZPM chuan, "Kan ram politics boruak kal dan leh hun kal tawhte thlir lêtin, mimal taka amah beia thlur bing a nih tâk zel avangin venhimna uluk zawk leh khauh lehzual pek a, a himna tur ngaihtuahpui hi sorkarin a rang thei ang bera a tihmâkmawh niin kan hria," an ti a; Lalduhoma'n sorkar khalh ngil tuma theihtawp a chhuahnaah leh tuna a hun tawng mek aṭangin mimal takin pawl ṭhenkhat tan hnawksak tihna a lian hlea a lan thu an sawi.

ZPM Southern Hqrs, Lunglei hian a rang thei ang bera Lalduhoma venhimna ṭha tak pe turin Mizoram sorkar an ngen a; venhimna uluk loh vanga a chungah thil ṭha lo a thleng a nih chuan, Zoram mipuiin sorkar an ngaihdam theih loh tur thu an tarlang.