Lirthei chuan man thar

State Transport Authority (STA)-in mihring phur sumdawnna lirthei chuan man (fare) a bithliah thar angin Aizawl City Bus chuan nimin aṭang khan fare thar an hmang ṭan.

STA-in Aizawl City Bus tana chuan man a bithliah thar chu - stand khatah Rs. 8, stand hnihah Rs.10, stand thumah Rs. 12 , stand liah Rs. 15, stand nga leh stand rukah Rs. 18 leh stand 10 ah Rs. 20 a ni.

STA-in lirthei chuan man a bithliah thar hi March 12, 2024 khan tihchhuah niin, hriattirna tihchhuah ni aṭang hian hman nghal a ni a; sumdawnna lirthei dangte pawhin an zawm tawh nia thu dawn a ni.

Sumdawnna lirthei mihring phur chite chuan man (fare) thar hi two wheeler taxi, taxi leh autorickshaw-ah chuan kum 2021-a STA-in fare a bituk aṭangin Rs 5 zelin a pung a; maxicab-ah erawh chuan kum 2021-a STA bituk aṭangin Re .50 (duli) in a pung thung.