Minister hoin HTE Board ṭhukhawm

Higher & Technical Education Board chu nimin khan an chairman Dr R Lalthangliana, HTE minister hoin Secretariat conference hall-ah an ṭhukhawm a; Rashtriya Uchchattar Shiksha Abhiyan (RUSA) hnuaia college-a thawk assistant professor hlawh la thei lote chungchang sawi lan a ni.

Meeting-a tarlan danin, RUSA hnuaia assistant professor-te hlawh tur hmuh a nih theih nan theihtawp chhuahin sorkar laipui dàwr reng a ni a, lehkha pawimawhte pawh thehluh a ni tawh. Kumin chhungin hlawh an lâk hman ngei an beisei.

RUSA Phase 2.0 hman mek chu March 31, 2021-a tàwp tur a ni a, April 2021 aṭangin Phase 3.0 kalpui ṭan a nih ngei a beiseiawm. Phase 3.0 awm turah Mizoramin a chhawr ṭangkai tur rawtna chi hrang hrang pawh sorkar laipuiah thlen tura hmalak a ni.

Mizoram Polytechnic building ṭáwl tawh tuaihnûm leh hman ṭangkai dan tur ngaihtuah a pawimawh thu leh a hmanhmawhthlak thu sawi lan a ni a; chak zawka hmalak a nih theih nan HTE Board hnuaiah study committee din an rél.

Lungleia MZU Southern Campus hmun atan Mausen rama Sazatlangah ram hectare 300-a zau ruahman phawt a ni a; din thuai a nih theih nan a dinna tur ram chu sorkar dan anga land lease tihfel thuai a nih theih nan chak zawka bawhzui ni se, tih a ni.