Ran natna ûm bona tur tlangzarh

Nimin khan AH&Vety secretary Lalzarmawii chuan Selesiha AH&Vety hmunah ran natna ûm bona tur, National Animal Disease Control Programme (NADCP) on Foot and Mouth Disease (FMD) leh Brucellosis chu Mizorama kalpui ṭan turin a tlangzarh.

Vety rest house-a tlangzarhna inkhawm hi AH&Vety additional director Dr Lalnuntluanga Colney-in a kaihruai a, Lalzarmawii leh AH&Vety director Dr Hmarkunga ten thu an sawi. Cattle Breeding Farm, Selesihah a bul ṭan nan ear tag leh vaccine-te pék nghal a ni.

Tarlan danin, India ram hi khawvela ran (livestock) tamna ber a ni a, ran chi hrang hrang vbc. 125 chuang a awm. Ran hri/natna ṭhenkhat avangin ram páwna sa leh bawnghnute thawn chhuahte a tisukuk ṭhin a, ram economy thlengin a nghawng buai ṭhin.

Department of Animal Husbandry and Dairying hmalaknain kum 2019 khan prime minister Narendra Modi chuan ram chhunga FMD leh Brucellosis natnate thunun leh nuai bona turin NADCP a hawng a, state leh union territory tina kalpui tur a ni.

NADCP-in a tum ber chu - India rama ran (bâwng, láwi, kèl, beram leh vawk) nuai 5,000 chuangte chu FMD vaccine pék leh Brucella vaccine hmanga láwi leh bâwng lá, thla 4-8 a upa nuai 360 vel hri danna pék a ni. Kum 2025-ah chuan natna chi hnihte hi thunun a, 2030-ah chuan nuaibo vek tum a ni.

Ram puma NADCP hnuaia hmalakna senso tura hisâp chu kum 5 chhung atan cheng vbc. 1,265 a ni a, sorkar laipuiin a tum vek dawn a ni.