Football Academy hlamchhiah vangin NE state dangah sawn tum a ni - MPCC

11th December, 2020

Mizoram Pradesh Congress Committee (MPCC) chuan, Mualpuia TATA Trust Football Academy, Centre of Excellence chu MNF sorkarin a hlamchhiah avangin hmarchhak state dangah sawn tum mek a nih thu an tarlang.

April 2018-a Mizoram sorkar leh TATA Trust ṭangkawpin 3rd MAP hmuna an din TATA Trust Football Academy, Centre of Excellence chu MNF sorkarah nasa taka hlamchhiah a nih thu sawiin MPCC chuan, "Tute emaw tan ringawta sum siamna tur sports project buaipui lo a, sports infrastructure awm sate tichangtlung tura hna thawk turin MNF sorkar kan phût a ni," an ti.

Congress party tarlan danin, TATA Trust Football Academy, Centre of Excellence chu April 2018-ah din a ni a, Rajiv Gandhi Stadium-ah tlai tin football khelh zirin hun an hmang ṭhin. Academy changtlung tak niin, coach pawh ram dang aṭangin chah a ni a; Mizo 50 vel thawkin, chhungkaw eizawn nan ṭangkai takin an hmang.

Academy chhuak naupang pali chu India junior team-ah an tel tawh a, Bengaluru FC junior team-ah pahnih lâk tawh niin, pali dangin Athletico Madrid Academy an zawm tawh bawk.

TATA Trust hnenah MNF sorkarin a rûkin cheng vaibelchhe khat chuang a dil a, TATA Trust hotute lungawi loin, TATA Trust Academy hi NE state dangah sawn an tum mek niin Congress party chuan an tarlang.

Football Academy chu Mizo naupangte tan a ṭangkai em em laiin, Congress sorkar laia hmalakna a nih avangin MNF sorkarin a hlamchhiah a, harsatna hrang hrang an siam tih sawiin MPCC chuan, "Mizo naupangte tana academy changtlung, hlawhtling leh ṭangkai tak kan neih mek laia NE state danga sawn tumna a awm hi hriatthiam harsa kan ti hle a ni," an ti.

MPCC chuan, Congress sorkarin infiamna lamah nasa takin hma an la a, infiamna hmunhma tam tak an din a, chumi rah chu Mizo ṭhalaite'n an seng mek niin an sawi a, "Infiammi tam takin eizawn nan infiamna an hmang thei ta hi Congress Ministry hnathawh rah pakhatah kan ngai," an ti. Sports infrastructure awm sate tichangtlung zawnga uar zawka hma la turin MNF sorkar an phût thu an sawi bawk.