Mizoram MP nih tumin mi parukin hming an pe
April 19, 2024-a Mizorama Lok Sabha MP inthlana chuh tura hming pek luh theih hun chu nimin khan a tâwp a, Mizoram MP nih tuma returning officer Nazuk Kumar, Aizawl district election officer hnena hming pe mi paruk an awm.
Mizoramin Lok Sabha-a seat pakhat a neih chuh turin political party pangain candidate an nei a, independent candidate nia chuh tura hming pe pakhat a awm bawk a, an vaiin mi paruk an ni.
Nimin khan Returning Officer hnenah MNF candidate K Vanlalvena, Indian National Congress (INC) candidate Lalbiakzama leh BJP candidate Vanlalhmuaka ten hming an pe lut.
March 26, Thawhlehni khan PC party candidate Rita Malsawmi leh independent candidate Lalhriatrenga Chhangte ten hming an pe a; ZPM candidate Richard Vanlalhmangaiha chuan March 22, 2024 khan hming a lo pe lut tawh bawk.
Lok Sabha inthlanpui neih tura Mizorama candidate nih tumte tan nimin kha hming pek luh hun tàwp a ni a; nomination paper-te chu vawiinah endik a ni ang a, inhnûkdâwk duhte tan March 30, 2024 thleng hun hawn a ni ang.
Mizorama Lok Sabha inthlan hnuhnung ber, kum 2019-ah pawh khan candidate mi paruk an awm a; candidate an tam ber ṭum - kum 1991-ah chuan mi pasarih an awm a, Mizoram state a nih hnua candidate an tlem ber ṭum - kum 2004-ah mi pathum an awm. Mizoram state a nih hma, kum 1980 khan candidate mi pahnih chiah an lo awm tawh bawk.