Lawngtlaia internet chungchang sawiho

Lawngtlai DC Dr Andrew Vanlaldika chuan nimin khan a pisaah BSNL, Bharti Infratel Limited (Airtel) leh Jio hotute a kâwm a, an district-a internet service a ṭhat zawk theih dan tur a sawipui.

Dr Andrew H Vanlaldika chuan, khawvel ṭhang mekah inbiakpawhna a ṭhat loh chuan hna thawh a harsa tawh tih sawiin, "Kan district hian inbiakpawhna leh internet service-ah hun rei tak chhung harsatna a tâwk tawh. Covid-19 léng vanga zirlaite tana online class kalpui a nih hnuah phei chuan district mipui, a bik takin zirlaite leh nu leh pate'n harsatna an tâwk nasa zual," a ti a, internet service pe chhuaktute chu ṭan la zual turin a chah.

Ṭhutkhawmah hian service provider-te chuan kháwl chak tâwk tawh lo leh consumer tam zel vanga kháwlin a zawh loh thu te, tower din belh a ngaih thu te, khuarel leh mihring kut vangin hrui a chah nasat thu te, thawktu indaih lohnate leh Covid-19 vanga an harsatna tawh hrang hrangte an sawi. Harsatnate chu chinfel a nih theih dan tur an sawiho a ni.

Service provider-te chuan, mipui harsatna an hriatpui thu leh theihtawp an chhuah ṭhin thu sawiin, "Kháwl thila harsatna tam tak hi mipui pawhin min hriatthiampui se kan duh hle. Mipuiin harsatna an tawhin social media-a phun lungawipui mai loin, kan hnenah thlen se, harsatna tam tak chu chinfel theih a nih a beiseiawm," an ti.