Free Special Coaching hawng

Sorkar laipuia Ministry of Labour & Employment-in a ṭum khatna atan Mizoramah thla 11 awh tur Free Special Coaching an buatsaih chu nimin khan Labour, Employment, Skill Development and Entrepreneurship (LESDE) secretary Dr Lalzirmawia Chhangte-in Archive Hall, Aizawlah a hawng.

Dr Lalzirmawia Chhangte chuan, human resource development (mihring tihhmasawn) chu Mizoram ang industry leh factory nei ve lo tan a pawimawh zual thu sawiin, "Rahbi pawimawh em em mai chu skill development a ni. Ṭhalaite thiam thil neihtir, chhawrtlak thiam thil (em­ploy­able skill) neihtir hi a ṭul tak zet. Ministry of Skill Development lo ding ta hian state sorkar leh private institution-te nen ṭang kawpin thiamthil zirna (skill training) hi programme lian tak a kalpui ta a ni," a ti.

Special Coaching Scheme course director Remtluangi Renthlei sawi danin, special coaching atana senso chu sorkar laipuiin a tum vek a, schedule caste leh schedule tribe-te hmasawnna tura buatsaih a ni.

Special Coaching for SC/ST hi India ramah state hrang hrang aṭangin centre 19 thlan a ni a; candidate tin tan thla tin stipend Rs. 1,000 an bank account-ah thun a ni dawn a, book grant pek a ni bawk ang. Seat awm zat chu 50 a ni.