Mau hmanga thilsiam zirna buatsaih

UNDP, EXIM Bank leh Bamboo Development Agency ṭangkawpin Chite Bamboo Handicraft Cluster member-te tana hnang tah zirna  ni 45 chhung awh tura an buatsaih Capacity Building/ Skill Upgradation Training on Bamboo Based Handicraft chu nimin khan hawn a ni.

Training hawnaah hian UNDP hotu Betsey K Vanlalpeki chuan UNDP leh EXIM Bank hian 'Capacity Building of the MSMEs in North East India for Competitiveness' tih hmangin project neiin, hmarchhak tlangdungah chuan Mizoram leh Assam-ah chiah tun dinhmunah project an neih thu sawiin, "Project hmang hian kuthnathawk tu/loneitute, puantah ṭhinte leh kutthemthiamna hmanga thil siamchhuak tute chawikan nan training te, exposure visit/ hmundang tlawhpuina hun te siam a lo ni tawh ṭhin. Hralhchhuah lama puih an nih nan online hmanga an in zawrhna tur web portal leh mobile apps te siam mek zel a ni," a ti.

Betsey K Vanlalpeki chuan training hlawhtling tak neih mai piah lamah hian a zawh hnuah pawh kan thiamthilte kan ram chhungah chauh ni lo ramdangah hralh chhuah chur chur ni se tih chu an duhthusam a nih thu sawiin, "Khumbeu, kan hnam thuam zînga mi, pawimawh tak leh kan larpui tak hi Mizoram pum huap pawn tah thiam an tlem tawh hle.  He thiamna hi a thih mai loh nan leh tam tak kan siamchhuaha kan hralhchhuah theih nân he training hi buatsaih a ni," a ti a, training hlawhtling tak buatsaih a nih ngei a beisei thu a sawi.