KHAWTHLIR

State Referral Hospital (SRH) medical superintendent Dr C Laldina chuan nimin khan Falkawn BRGSK building-ah SRH Clinic a hawng. SRH (ZMC) chu dedicated Covid-19 hospital a nih avangin, dam lohna dang neite inentir leh inenkawlnaah Falkawn leh a chhehvel khuate'n harsatna an tâwk a, mipui mamawhna vangin Falkawn VC chuan clinic siam turin sorkarah an ngen a ni. SRH Clinic hi Thawhṭanni leh Zirtawpni inkarah ni tin hawn a ni dawn a, specialist doctor-te an inṭhut chhâwk ṭhin ang.

Zoram Peoples' Movement (ZPM) president Lalliansawta chuan nimin khan an party secretary general atan PC Vanlalruata a ruat. PC Vanlalruata hi general secretary ni lai a ni.

Serchipa UDPA department leh District Child Protection Unit chuan nimin khan Faina Hapta pualin an pisa leh a chhehvelte tihfai hnatlang an huaihawt. Chhiahtlang South Village Council pawhin khawtlang huap hnatlang an ko a, an huam chhunga national highway kawng kam an sam fai.

Nimin thleng khan Covid-19 dona atan Chief Minister Relief Fund-ah cheng nuai 2,155 a lut tawh a, cheng nuai 1,950 hman tawh niin, la hman loh cheng nuai 205 a awm.

State Referral Hospital (SRH) aṭangin nimin khan Covid-19 vei enkawl zinga negative tawh mi pathum chhuahtir an nih avangin SRH-ah hian hripui vei vangin mi pakua chiah enkawl an ni ta. Mi pakuate hi mipa panga leh hmeichhia pali, kum 13-57 inkar an ni a; ICU-a awm mi pathumin hma an sawn a, Isolation Ward-a awm mi parukte'n harsatna an nei lo tih SRH-ZMC Bulletin chuan a tarlang.