KHAWTHLIR

Aizawl SP C Lalruaia chuan nimin khan a pisaah Central YMA Vigillance Sub-Committee member-te a kâwm a; mipuite'n Krismas leh kumthar hlim leh him taka an hman theihna tura sorkar thupek awm sa, hâlpuah leh hâlmawi khuahkhirhna leh dan leh thupek kenkawh chungchanga hmalakho dan tur a sawipui. Inkawmnaa telte chuan,dan leh thupek zâwm turin mipui an ngen a, "Dan leh thupek pawisa lote chu an chungah dan angin action lak a ni ang," an ti.

December 9, Nilaini tlai khan Champhai khawpui dái, Khankàwn leh Zotlang inkar kawng World Bank Road-ah hmeichhe naupang kum 3 mi thiin char a ni. Thu dawn danin, mitthi hi lirthei aṭanga tla a nih rin a ni a, Champhai Police Station hriattir a nih hnuah police-in an buaipui zui a, a hnuah Lawmsangzuali (3) d/o Neihlianthanga, Ruantlang a ni tih hriat a ni.

Khanpui branch YMA chuan thuchhuah siamin, Chalfilh tlang leh Chalfilh Vanzau Tourist Lodge chu Covid-19 hri leng avangin mipui tlawh an phal lo. Thuchhuahin a tarlan danin. "Mi tam tak hripui boruak avanga rilru intihthawhven duha kal châk leh kal duh an awm tih kan hria a, min hrethiam turin kan inngen thar leh a ni e," an ti.

Sericulture minister Dr K Beichhua chuan nimin khan an department enkawl Silk Showroom, Chaltlanga mi chu dàwr theih turin a hawng. Silk Showroom-ah hian silk là aṭanga deh chhuah puanchei, ngotekherh, puan zeh, shawl, bag, necktie leh Mizorama sericulture farmer-te thar chaw ṭha leh hriselte zawrh a ni a, Silk Mark of India pawmpui (certified) vek a ni.

Siahaa NSS volunteer-te chuan nimin khan Siaha District Hospital blood bank-ah thisen unit 15 an pe a, mipa 10 leh hmeichhia pangain an pe a ni. Thisen petute chu Siaha Higher Secondary School aṭangin mi pakua leh Saiha College aṭangin mi paruk an ni.