Lok Sabha inthlana chuh tuma hming pete pawm vek an ni

April 19, 2024-a Mizorama Lok Sabha inthlanpui awm tura chuh tuma hming pe mi parukte nomination paper-te chu March 28, Ningani khan Aizawl DC pisaah general observer Dr Nipun Vinayak hoin endik a ni a, hming pe mi parukte chu hnâwl awm loin pawm vek an ni.

Kumina Mizoram Lok Sabha inthlanah hian recognised national & state political party pali, registered political party pakhat leh independent candidate pakhat an awm dawn a; inhnûkdâwk leh duhte tan March 30, vawiin tlai thleng hun hawn a ni ang.

Lok Sabha inthlana candidate turte chu - Lalbiakzama (INC), Vanlalhmuaka (BJP), K Vanlalvena (MNF), Richard Vanlalhmangaiha (ZPM), Rita Malsawmi (PC) leh Lalhriatrenga Chhangte (Independent)-te an ni.

March 28 vek khan chief electoral officer Madhup Vyas hoin a pisaah sorkar hotute'n Lok Sabha inthlana vote tla a ṭhat theihna tur an ngaihtuah a; CEO chuan, inthlanpui awm apiangin Mizoramah MLA inthlan aiin Lok Sabha inthlanah vote tla a chhe ziah ṭhin tih a sawi.

Madhup Vyas chuan, vote thlak tura mipui zirtir kawngah ṭan lak a ṭul thu sawiin, "Mizoram hi MLA inthlanpuiah India rama vote tlak ṭhatna ber kan nih ṭhin laiin, a hnu lawk thla li âwrhah Lok Sabha MP thlan leh nghal a ni a, MLA inthlanpuia vote tla a phâk loh bakah, Lok Sabha inthlan hnuhnung ber kum 2019-ah phei chuan national average pawh kan pha lo," a ti.

Ṭhutkhawmah hian mipui hnena vote thlâk tura zirtirna kalpui dan turte sawiho a ni a; kalphung pangngai lo deuh, thil thar kalpui dan tur te, ṭhalaite leh a vawi khatna atana vote thlak turte hnena hmalak dan turte sawiho a ni.

Mizorama Lok Sabha inthlan hnuhnung ber, kum 2019-ah pawh khan candidate mi paruk an awm a; candidate an tam ber ṭum - kum 1991-ah chuan mi pasarih an awm a, Mizoram state a nih hnua candidate an tlem ber ṭum - kum 2004-ah mi pathum an awm. Mizoram state a nih hma, kum 1980 khan candidate mi pahnih chiah an lo awm tawh bawk.