Aizawl châwmtu tui lâkna thar hlawhtling taka enchhin a ni

Tuia Aizawl khawpui châwmtu tur tui lakna siam thar, Augmentation of Water Supply & Cons­truction of 37-MLD Water Treatment Plant (Phase-3) tui pump khawl chu electric current hmangin March 28, Ningani tlai 4:52 khan hlawhtling takin enchhin a ni.

Thu dawn danin, electric power hmanga tui pump enchhinna hi Water Treatment Plant (Phase-3) siamtu SIPMIU engineer-te leh PHE department engineer-te'n an buaipui a; Setlâk luiin Tlawng a finna bul aṭangin hlawhtling takin Laipuitlang tuizem lianah tui pump chhoh a ni.

Augmentation of Water Supply & Cons­truction of 37-MLD Water Treatment Plant (Phase-3) hi September 2023 khan khatih laia PHE minister Tawnluia'n a lo hawng tawh a, diesel khawl (standby) hmangin Laipuitlangah tui pump chhuah a lo ni tawh.

37-MLD Water Treat­ment Plant hawn a nih lai hian tui pump-na khawl chu electric current pawh luh a la nih loh avangin electric power hmanga tui pump theih a la ni lo a; hawn a nih aṭanga thla ruk velah electric hmangin tui pump a ni ta a ni.

Aizawl khawpui châwm mektu Greater Aizawl Water Supply Scheme Phase-I hmangin ni tin tui litre nuai 108 pek ṭhin a ni a, GAWSS Phase-II hmangin ni tin tui litre nuai 240 pek theih a ni bawk. 37-MLD Water Treatment Plant (GAWSS Phase-III) hmangin ni tin tui litre nuai 370 pump theih a ni ang.

37-MLD Water Treat­ment Plant hi UDPA hnuaia SIPMIU-in thawkin, kum 2018-ah bul ṭan a ni.