Vairengtea in kângah In neitunu a kâng hlum

Nimin zing khawvar hma, dar 1 vel khan Vairengte Kawngthar Venga auto-rickshaw stand chhaka Sanu Thapa (47) d/o Shasi Kala chenna in, Assam type a kang a, in neitunu Sanu Thapa a kan hlum bakah, in leh a chhunga bungrua zawng zawng a kâng ral.

Thu dawn danin, in kângah hian a neitunu a kâng hlum tih hriat a ni mai lo a, in a kan zawha hmunhma enfiahnaah Sanu Thapa ruang hmuh a ni. Sanu Thapa ruang hi Vairengte police-te leh mi tlawmngaite'n an buaipui zui a, Vairengte damdawi-inah endik a nih hnuah nimin tlai khan vui a ni.

In hi a bang dâp, a chung rangva a ni a, vawk chaw chhumna aṭanga kângmei chhuak a nih rin a ni. Sanu Thapa hi a fanu kum 12 mi nena khawsa an ni a, a fanu chu Ningani zan khan a ṭhiante inah a riak niin an sawi.