BJP sorkar hnuaiah hnam leh sakhaw tlem zawkte an him lo - Lal Thanzara

Mizoram Pradesh Congress Committee (MPCC) president Lal Thanzara chuan, BJP kaihhruai sorkar hnuaiah hnam leh sakhaw tlem zawkte an him loh thu leh, tun ṭuma MP inthlan tur chu Mizo Kristiante tana hun pawimawh ber a nih thu a sawi.

Lal Thanzara hian March 28, Ningania Lok Sabha inthlan campaign hawnna inkhawm Vanapa Hall-a an hmanah thu sawiin, "Hnam tlém zawk leh sakhaw tlém zawk betute BJP sorkar hnuaiah kan him loh em avangin Mizo mipuite'n kan ngaih pawimawh a ngai. Congress party hruaitu hmasate'n hnam tinte'n zalen taka kan sakhua kan biak theih nan India danpui hnuaiah sakhaw zalenna min siamsak a, chu chu BJP sorkar hian nuaibo an tum mek a ni," a ti.

Manipur sorkarin Good Friday leh Easter Sunday-ah sorkar hnathawkte pisa kâi tura a tih thu sawiin Thanzara chuan, "Mizoram Synod pawh cheng vbc. 25 Income Tax hoin an ṭhíng mek niin kan hria," a ti a; chutiang thil chu tun hmaa la awm ngai lo a nih thu a sawi.

MPCC President chuan, AAP hotu leh Delhi chief minister Arvind Kejriwal man chungchangah USA leh Germany sorkar hotute an ṭawng chhuak hial tih sawiin, "Hetih lai hian kan rama rorel mek ZPM leh MNF party-te chuan NDA-a tel an inchuh ta emaw tih tura thuthangte hi thil zahthlak tak a ni. Kan ram, kan hnam, kan sakhua a him loh chuan hmasawnna eng ang pawh nei mah ila a him lo a ni tih kan hriat a ngai," a ti.

Congress party MP candidate Lalbiakzama pawhin thu sawiin, "RSS leh an party din BJP hian Hindu lal ram din hi an tum ber a ni a, Hindu ni lote chu second class citizen ang chauhah min chhuah mek a ni," a ti a; Forest Conservation Act chu Mizoram tan a hlauhawm thu a sawi.

Lalbiakzama chuan, Article 371(G) angin Mizoram chu chhuhsak theih a nih loh laiin BJP sorkarin chhuhsak an tum mek niin a sawi a, "Electoral Bonds an hmang sual a, Income Tax department leh Enforcement Directorate-te hmangin company-te sum party tan an chhuh a, press mite zalenna an rapbet a, court hial pawh an thunun vek tawh a ni," a ti.

Lalbiakzama chuan, "MP ka nih ve theih chuan environment khawih lo thei ang berin hmasawnna hna thawh a nih theih nan leh Mizoram intodelh theih nan hma ka la dawn. BJP an sorkar hlauh a nih pawhin kan ram tana ṭha lo tur an dan siam leh hmalaknate Constitution ṭan chhanin nasa takin ka bei lêt ang," a ti a; India ramah Mizote thlamuang taka an awm zel theih nan amah vote turin mipui a sáwm a ni.