K Vanlalvena aia Mizoram mipuiin an thlamuanpui an awm lo - Zoramthanga
MNF president Zoramthanga chuan, March 27-28, 2024 khan Champhai Bethel, Khawzawl leh Kawlkulhahte Lok Sabha inthlanpui atan a campaign a, vantlang inkhawmah thu sawiin, Lok Sabha inthlan tura MNF candidate K Vanlalvena aia Mizoram mipuiin an thlamuanpui an awm lo niin a sawi.
Zoramthanga chuan, April 19, 2024-ah Mizoram aiawh tur MP thlan a ni dawn tih sawiin, "MP hi enchhina thlan chi a ni ve lo. Pi leh pu nei ṭha phei chu thlan chi a ni lo, he laia pi leh pu neih ṭhatin Parliament-ah awmzia a nei lo," a ti.
Tun hmain Mizoramin MP ngawi reng an nei ṭhin tih sawiin Zoramthanga chuan, "Kum 2022 a lo her chhuah meuh chuan MNF chuan MP (Rajya Sabha) member atan Pu K Vanlalvena kan thlang a, Mizoramin hun rei tak MP ngawi reng kan lo neih tawh ṭhin chu rawn sâwi danglam dâwrhin, Mizoram mipui aiawh a nihzia a rawn pholang. Mizoram tan a huaisenzia leh hnam a hmangaihzia hi Delhi tlangah an tlangaupui ta piap piap mai," a ti a, Mizoram mipui MP tia koh a nih hial thu a sawi.
MNF President chuan, "Mizoram MP awm tawhah Pu K Vanlalvena tluka Mizoram mipuiin an thlamuanpui hi an awm lo. Assam ramri buaiah kan thlamuanpui a, CAB leh UCC a do hlawhtling bawk. Manipur raltlan leh Myanmar raltlante tan Parliament-ah huaisen takin a au chhuak a, Mizoram tan chuan a theihtawp tak meuh a chhuah tih chu Zoram mipui paw'n kan thlamuanpui danah a lang chiang hle," a ti.
Assembly inthlan leh Parliament inthlan chu a dang daih tih sawiin Zoramthanga chuan, "Central-ah BJP sorkar a din a rinawm leh hle a, BJP sorkar a rawn ding leh a nih phei chuan MP huaisen, ram leh hnam hmangaih Pu K Vanlalvena te ang kan mamawhna a sang hle dawn a ni," a ti a; K Vanlalvena vote turin mipui a sáwm.
Zoramthanga chuan, kum 2023-a MLA General Election-a Zoram mipui thutlukna an pawm thlap thu sawiin, "MNF chu Pathianin hun a tihah a thukru a, a hun a tih hunah a chawisang leh ṭhin. Chumi a thlen dik theih nan chuan sorkar thar a pian phawt a ṭul zawk a ni," a ti bawk.