KHAWTHLIR

Easter Sunday

Naktuk Pathianni hi Isua Krista kraws-a khenbeh a nih hnua a thawh lehna ni, Easter Sunday a ni a, kohhran hrang hrangin an lawm dawn. Easter Sunday-ah hian kohhran tam tak chuan zing ni chhuah hlimah Isua thawh lehna làwmin Easter Sunrise Service an hmang dawn a, Salvation Army corps hrang hranga band-te'n Isua thawh leh thu tawtawrawt hàmin an puang ang. Tualchhung kohhran tam ber chuan Isua thawh lehna lawm nan thingpui ruai an ṭheh dawn a ni.

Media talent show

Mizo Sunday School Union leh Synfo chuan March 26-27, 2024 chhung khan Mission Vengthlang Kohhran golden jubilee hall-ah Naupang Pual Media Talent Show an buatsaih. Intihsiaknaah hian kohhran thlan chhuaha tleirawl leh naupang inkhawm aṭangin thiam thil chi hrang hrang 45 entir a ni a; làm, zai, instrumental, la phiar, milem ziah, origami leh a dangte a ni hlawm.

LADC VC roll

Lai Autonomous District Council hnuaia village council inthlanpui buatsaih tura Summary Revision of Electoral Rolls, 2024 kalpui tur chungchangah March 28, Ningani khan LADC huam chhung VC 99-a village level officer (VLO)-te tan Lawngtlai DC conference hall-ah thil pawimawh hrang hrang inzirtirna buatsaih a ni. Final electoral roll chu April 17, 2024-ah tlangzarh tum a ni.

Hnathawh thlirho

Khawzawl District Consultative Committee, District Level Review Committee leh District Level Security Committee chu an chairman K Lalrohlua, bawrhsap hoin March 28, Ningani khan an ṭhukhawm. October-December 2023 chhunga Khawzawl district-a bank hrang hrangte hnathawh thlir lêt a nih bakah, hmachhawpte leh hmalak zui dan turte sawiho a ni.

Zawhfiah theih

Lok Sabha inthlanpui neih turah Aizawl district mipui zinga inthlan chungchang harsatna leh zawhna nei tan phone number 1950 (toll free) leh 0389- 2317440-ahte engtik lai pawhin biak theih reng a nih thu sorkar thuchhuahin a tarlang.

Election training

Siaha district election officer VL Hruaizela, bawrhsap chuan March 28, Ningani khan Lok Sabha inthlan awm tura sector magistrate 21-te pualin DRDO conference room-ah training a hawng a; sector magistrate-te chu Model Code of Conduct leh inthlan kaihhnawih dan hrang hrangte hre chiang turin a chah. Training-ah hian district master trainer pahnih R Lalnunkimi leh Ngurthansanga ten thil pawimawhte an zirtir a ni.

Polling party-te thliar

Aizawl DC conference hall-ah March 27, 2024 khan Lok Sabha inthlanpui awm tura inthlan kaihhnawih chanvo neite duty-na tur thliar vawi hnihna (second randomization) neih a ni a, hmeichhe hlang awmna polling party pawh thliar a ni. Kumin MP inthlanpuiah hian Aizawl district chu segment 12-ah ṭhen a ni a, inthlan buaipui turin polling party 321 siam a ni. Polling party pakhatah mi pali zel an awm a, mi 1,284 ruat a ni. Segment tinah hian polling party pali chu hmeichhe hlang awmna a ni dawn.