Candidate-te sum hman vil dan sawiho
Lok Sabha inthlanpui atana Mizoram tana expenditure observer Arvind Sharma chuan March 28, Ningani khan Aizawl DC conference hall-ah candidate-te sum viltu expenditure agent-te a kâwm. Lok Sabha inthlanpuiah candidate pakhatin campaign senso atan Rs 95,00,000 thleng an hmang thei tih tarlan a ni.
Arvind Sharma chuan, expenditure agent-te chu candidate-te sum hman dan dik leh langtlang taka chhinchhiaha vawng turin a chah a, "Inthlanpuiah hian Mizoram MP candidate-te'n an sum hman theih chin cheng nuai 95 chu an hmanna uluk leh dik taka chhinchhiah a pawimawh. A theih ang anga political party leh candidate tu tan pawh ang khata inelna hmun siam a nih theih nan sum hman theih chin bithliah a ni," a ti.
Mipuiin an mi duh tak vote thei loa sum leh therhlo hmanga an duh thlanna tibuai a nih loh nan sum hman dan endik a pawimawh thu sawiin Arvind Sharma chuan, "Election Commission of India-in sum vil leh endik danah inkaihhruaina uluk tak siamin, thil thup leh dan kalha thil tih hmuh chhuah a nih chuan ECI chuan na takin hma a la thei," a ti. Agent-te chu dan bu bèl chiang tur leh India ram democracy humhimna atan an pawimawh a ni tih hre thar turin a chah bawk.