Tribal dikna leh chanvo humhalh turin NDA-ah kan awm lui zel dawn - K Vena

Lok Sabha inthlan tura MNF candidate K Vanlalvena chuan, Mizo ram, hnam leh sakhua himna tura pên chhuak a nih thu leh tribal-te dikna leh chanvo humhalh zel turin National Democratic Alliance (NDA)-ah an awm luih zel dawn thu a sawi.

K Vanlalvena hian March 28, Ningani zing khan Serchhip Bazara campaign vantlang inkhawmah thu sawiin, "Kan ram, kan hnam leh kan sakhuain nêkna nasa tak a tawh mek karah Zoram mipui leh Zo fate tana huai taka ding tlat turin, mipui candidate ni tura pên chhuak ka ni," a ti.

NDA chuan, MNF chu NDA dintu zingah an telh thu sawiin Vanlalvena chuan, "BJP hmalakna avangin Kristianna a chêp tih hi a taka hretu ka ni. India ramah Hindu nationalism a lian zel a, BJP-in politics khelh nan an hmang a, hei hi NDA chhunga awm Kristian MP-te'n na taka kan dodal zel a ṭul. Hindu kulmûk hlangin ro an rèl lohna turin Kristian MP-te an tel ve rih tlat a ngai a, tribal-te dikna leh chanvo humhalh zel turin NDA-ah kan ṭhu lui zel dawn a ni," a ti a; BJP-in anmahnii'n sorkar siam theihna khawp MP an neih hmel tih a sawi.

K Vanlalvena chuan, Rajya Sabha-ah NDA ṭhutna aṭangin Mizoram, Mizo hnam leh sakhua himna turin theihtawpin a lo au tawh ṭhin nia sawiin, "Sakhaw zalenna tia NDA lama ka ṭhu bei ṭhintute zingah Manipur-a biak-in hâl chungchang leh Myanmar aṭanga Kristian raltlante chungchang auchhuahpui chu keimah chiah ka ni," a ti.

MNF MP candidate chuan, mipui candidate tura inpe a nih thu sawiin, "Lok Sabha MP-ah thlan tlin ka nih chuan Mizoram hmasawnna turin state sorkar thuneitute nen pawh theihtawp chhuaha thawhho ka tum," a ti a; Mizoram, Mizo hnam leh sakhua humhim tura a hmalakna a chhunzawm theih nan amah vote turin mipui a ngen a ni.