Sumdawnna lirtheia meizûk khapna kenkawh dan tur rêl

Aizawl Traffic Police, National Health Mission leh National Tobacco Control Programme chuan March 28, Ninagni khan Aizawl SP conference hall-ah 'Training on Tobacco Control for Law Enforcers (Traffic Police)' an buatsaih. Mipui phur sumdawnna lirtheiah meizial zûk khap a nih thu leh mei zute chu Rs 200 chawitir theih an nih thu tarlan a ni.

Zirhona hi NTCP nodal officer Dr H Lian-thangpuia'n a kaihruai a; Traffic SP Stephen Lalrinawma chu khuallian a ni. NTCP state legal consultant Vanlalzari'n 'Vaihlo khuahkhirhna dan leh a kaihhnawih' tih thupui a sawi.

He huna tarlan danin, tunlaiin mipui phur sumdawnna lirthei (public transport) hrang hrangah meizûk chíng an la awm a; taxi, maxicab, city bus leh mihring phur chi sumdawnna lirtheiahte meizûk khap a ni a, mei zu man an awm chuan dan angin Rs 200 thleng pawisa chawitir theih an ni.

Mihring phur sumdawnna lirthei khalhtute chu an lirthei chhungah passenger zinga meizial zu an awm chuan khap ngam turin an ngen. Puipunna hmunahte pawh meizûk khap a ni bawk. Meizûk khapna dan chu ṭha taka zâwm turin mi tin an ngen a ni.