Political advertisement chhuahte bawhzui nghal zel turin inchah

Siaha District Media Certification & Monitoring Committee (MCMC) chu an chairman VL Hruaizela Khiangte, bawrhsap hoin March 28, Ningani khan an ṭhukhawm. Bawrhsap chuan, phalna la hmasa loa political advertisement siam leh chhuah reng rengah dan anga hma la turin member-te a chah.

DC chua, mipuite'n dik leh thianghlim taka vote an thlak theih nan ruahmanna ṭha siam a ṭul thu sawiin, "Social media hmang kan tam tawh a, political party-te tan mipui hnena inzawrhna hmun ṭangkai tak a ni. Social media bakah cable TV leh print media-ah inbeihna a tam dawn a, party mite'n ECI inkaihhruaina an bawhchhiat lohna turin hmalak a ṭul. Phalna la hmasa loa political advertisement siam leh chhuah reng rengah danin a phal angin hma la zel ang che u," a ti.

Inthlanpui awm turah media hman sual a nih loh nan MCMC-te'n hma la reng mah se, an véng séng lo mai thei tih sawiin Bawrhsap chuan, mipui leh party lamte chu theihtawp chhuahpui turin a sáwm.

MCMC secretary Zonunchama Ralte tarlan danin, inthlan puan ní aṭangin paid news a awm leh awm loh enfiah ṭan a ni a, press clipping pawh tih nghal a ni. Cable TV leh social media hrang hrangah political advertisement a awm leh awm loh enfiah mek zel a ni bawk.