Sorkar chungah CITUM an lawm
Centre of Indian Trade Union Mizoram (CITUM) chuan thuchhuah siamin, Environment, Forest and Climate Change department hnuaia wildlife guard-te leh CAMPA hnuaia anti-pouching squad-te'n kum khat dáwn hlawh an lak theih loh hnua sorkarin hlawh a pe ta chu lawmawm an tih thu an tarlang.
CITUM chuan, wildlife guard-te leh anti-pouching squad-te'n hun rei tak hlawh an lak theih loh chungchangah EFCC department hotute nasa takin an dawr a, EFCC Minister pawh an hmu tih sawiin, "Theihtawp min chhuahpuina zarah leh Chief Minister-in ngai pawimawh taka an hlawh eng emaw zat an han pe ta hi kan lawm tak meuh a, an chungah rinna leh beiseina sang tak kan nei a ni," an ti.
Hlawh la la ve lote pawhin an lak thuai an beisei thu sawiin CITUM chuan, "A hun taka hna hnuaihnung thawkte'n hlawh an lak ve zel theihna tura hma chak taka min lakpui zel turin kan beiseiin kan ring tlat a ni," an ti a; hlawh la la lote'n rang taka an lak theih nan hma la chhunzawm turin sorkar hotute an ngen.
CITUM chuan, "Tun sorkar thar pian hma deuh khan hnathawk ṭhalai, kum 10 chuang Forest department hnuaia thawk mekte chhan leh vâng awm loa bante tun kan sorkara Forest Minister-in min lak luhsak leh hi a chungah thinlung takin lawmthu kan sawi bawk," an ti a; hun rei tak EFCC department hnuaia thawk tawhte chawlhtir tumna a awm nia an hriat thu sawiin, bàn lo turin thuneitute an ngen tih an sawi bawk.