Lok Sabha MP inthlan turah candidate paruk an awm dawn

April 19, 2024-a Mizorama Lok Sabha inthlanpuiah can­didate paruk an awm dawn chiang ta a, an zinga pakhat chu hmeichhia a ni.

Lok Sabha inthlan chuh tura mi parukin hming an pek luhte chu March 28, 2024-a endik­naah pawm vek a lo ni tawh a; inhnûkdâwk leh duh tana March 30, 2024 tlai dar 3 thleng hun hawn chhungin inhnûkdâwk an awm loh avangin Mizoram MP tur thlannaah hian candidate paruk an awm dawn ta a ni.

Political party hrang hrang leh candidate-te chu ngawrh takin an campaign mek a, candidate ṭhenkhat chu Aizawl khawpui páwn lamah campaign-in an chhuak ṭan tawh.

Mizorama Lok Sabha inthlan turah hian March 20, 2024-ah notification chhuah a ni a, inthlan chuh tum (candidate)-te tan March 27 thleng hming pek luh theih niin, nomination-te chu March 28-ah endik a ni. Inhnûkdâwk duhte tan March 30, Inrinni thleng hun hawn a ni a, April 19-ah vote thlak a ni ang.

Lok Sabha inthlan hi India ram pumah thawh sariha neih a ni dawn a, vote thlâk thawh sarihna chu June 1-ah neih tur a ni. June 4-ah India ram pumah a ruala vote chhiar tur a ni a, MP inthlan kaihhnawih thilte chu June 6, 2024-ah zawh vek tura ruahman a ni.

MP inthlan tur atan hian January 1, 2024-a kum 18 tling chin behchhana Mizoram elec­toral roll thar, February 8, 2024-a tlangzarh tâk hman a ni dawn.

Electoral roll thar berah voter 8,61,277 an awm a, mipa 4,14,777, hmeichhia 4,41,520 leh service voter 4,980 an ni.