Hlim takin Easter Sunday lawm a ni

Nimin Pathianni kha Isua Krista kraws-a khenbeh a nih hnua a thawh lehna ní - Easter Sunday a ni a, Mizoram chhung leh pawna kohhran hrang hrangte'n hlim takin an lawm.

Easter Sunday-ah hian kohhran tam tak chuan zing ni chhuah hlimah Isua thawh lehna làwmin Easter Sunrise Service an hmang a; Salvation Army corps hrang hranga band-te'n Isua thawh leh thu tawtawrawt hàmin an puang.

Kohhran tam takah chuan nimin khan chawhma, chawhnu leh zanahte Pathian biak inkhawm neih a ni a, Presbyterian kohhrante leh Baptist kohhrante chuan an hmunpui aṭanga thupui thlan hmangin Pathian thuchah an ngaithla. Kohhran hrang hrangah chawhma inkhawm bânah thingpui ruai ṭheh a ni.

Catholic kohhrante chuan Inrinni zan aṭang khan Isua thawhlehna an hmang a, 'Krista chu êng a ni' tih lantir nan Easter Vigil hmangin, mei thar an la a, sathau khawnvar chhiin biak-inah an inkhawm.

Juda-te ni chhiar danah chuan, ni a tlak chiahin ni thar a inṭan a, chu chu Catholic kohhrante chuan hunpui bikah zuiin, Inrinni zan khaw thim aṭangin Isua thawh lehna an lawm ṭan ṭhin.

Easter Sunday leh Good Friday hi Krismas anga a ni ngai rengah hman a ni lo a, a chhan chu - Judate Kalhlên Kût hman lai vel, Nisan thla ni 14-ah emaw Isua a thi a, chu chu tunlaia March thla chawhnu lam, March 20 leh April 25 inkara thla bial lai a ni. Chuvang chuan Good Friday chu tun thlengin March 20 leh April 25 inkara thla bial lai (full moon hnaih ber) Zirtawpni-ah hman a ni ta zel a ni.