President leh Prime Minister-in Easter Sunday thuchah tichhuak

President Droupadi Murmu leh prime minister Narendra Modi chuan nimin khan an social media account kal­­tlangin Easter Sunday pual thuchah an tichhuak.

Droupadi Murmu chuan, ram chhung leh páwna Kristian zawng zawng Easter Sunday chibai bûkin, "He hun hi Isua Krista thawhlehna hriatrengna a ni a, hmangaihna leh lainatna entirna a ni," a ti a; mi dang tana inpekna nun leh inngaihdamna nun kawng zawh turin mi tin a sáwm. Isua Krista zirtirnate chuan remna leh muanna kawngah mihringte a hruai dawn thu a tarlang bawk.

Prime Minister chuan, "Easter-ah hian siam tharna leh beiseina thuchah chu hmun tinah thang chhuak se, he ni hian inpumkhatna leh remna tipung turin mi tin thinlungah hna thawk se. Mi zawng zawng Easter hlim taka hmang turin duhsakna kan hlan e," a ti.