KHAWTHLIR

Thisen pe

March 30, Inrinni khan YMA, Bethlehem Vengthlang Branch-in Civil Hospital, Aizawl tan thisen unit 92 an pe a, petute mipa 78 leh hmeichhia 14 an ni. KṬP, Khatla North Branch-in KṬP Day pualin Synod Hospital tan thisen unit 36 an pe a, petute mipa 29 leh hmeichhia pasarih an ni a; PYD (NEI), Lunglei Pukpui pawhin Civil Hospital, Lunglei tan unit 54 an pe a, petute mipa 41 leh hmeichhia 13 an ni.

AR-in ganja man

Assam Rifles chuan March 29, 2024 khan New Diltlang ram chhunga thlám pakhatah ganja kg. 12.050 an man a, Rs 12,05,000 hû a nih thu an tarlang. AR sipaite hian an thu dawn bawhzuiin rama thlâm pakhat an endik a, ganja an hmu chhuak ta a ni. Ganja leh a neitua puh mi pakhat chu Hnahlan police hnenah an hlân.

Kâng thelh inzirtir

YMA, Maubawk Branch chuan an branch hnuaia Disaster Sub-Committee hmalaknain March 30, Inrinni khan an branch YMA member nula leh tlangval 30 tan kâng ṭhelh dan leh chhanchhuah hna thawh dan zirhona an buatsaih. Inzirtirna hi Tlawng luia Tuithûm chhuahah buatsaih a ni.

POCSO Act zir

Kolasib District Legal Services Authority chuan March 30, Inrinni khan naupang humhimna dan, POCSO Act chungchang zirhona Bilkhawthlir Dawrvengah an buatsaih. Zirhonaah hian Bilkhawthlir Dawrveng Branch YMA member 53 an tel a, POCSO Act-in kumtlinglo naupang a venhim dan leh dan bawhchhetute hrem theih dante zirtir an ni.

Paid holiday

Lok Sabha inthlanpuiah voter-te'n vote an thlak vek theih nan Governor Dr Hari Babu Kambhampati chuan vote thlak ní, April 19, 2024 chu sorkar leh mimal hnuaia thawk zawng zawng tan chawlh ní-ah a puang. Governor-in chawlh a puan hi paid holiday a ni a, hna thawktute an chawlh avangin an hlawh lak hêk phal a ni lo.