Ruling party aṭang ngeia MP neih thil ṭul tak a ni - ZPM MP Candidate

Lok Sabha inthlan awm tura ZPM candidate Richard Vanlalhmangaiha chuan March 30, Inrinni khan Kolasib Press Club-ah thuthar thehdarhtute a kâwm a; ruling party aṭang ngeia MP neih a ṭul thu leh central-a party liante insalbehtir an tum loh a sawi.

Richard Vanlalhmangaiha chuan, Zoram mipui nghahfâk chief minister Lalduhoma kaihhruai ZPM sorkar hnuaiah kalphung thar an hmu zel chu thil lawmawm leh mipui beisei a nih thu a sawi a, "He sorkar thâ tichak tur hian kan hma lawka Lok Sabha inthlan turah state sorkar nen pheikhai rual taka ke pên thei tur ruling party aṭang ngeia MP kan neih hi thil ṭul tak niin ka hria," a ti.

Mizoram state budget aṭang ringawt chuan hmasawnna lian tham tam tak kalpui theihna tur sum a awm lo tih sawiin Richard-a chuan, "Sorkar inrêlbàwlna atan Mizoram budget tam zawk kan hman ral a ngai ṭhin," a ti a; central sorkar aṭanga hmasawnna hna thawhna tur sum awmte hai chhuah kawngah taimak chhuah a ngaih thu a sawi.

ZPM Candidate chuan, Mizoramin MP a neih tawhte'n theihtawp an lo chhuah ṭhin tih sawiin, "Amaherawhchu, vawiina kan thlen chin chu mipuite'n kan hre vek àwm e. A ngaihna hria leh ram hmangaihna tak tak thinlung nena hna thawk tur MP kan mamawh hle. Chutiang mi chu nia kan hotute'n min hriat avangin candidate atan min chhawp chhuak a ni," a ti.

ZPM chu regional party a nih thu sawiin Richard-a chuan, "Central lamah eng party mah zawmpui kan neih ve loh avangin central party liante tu mah insalbehtir kan tum lo. Kan hnam leh kan sakhaw him nan theihtawp chhuah ka tum," a ti a; chutih rualin, hnam leh sakhaw chungchang chu vote zawn nan hman ve a tum loh thu a sawi.

ZPM MP Candidate chuan, Pathian leh mipui zara thlan tlin a nih chuan a theihna zawng zawng sáwm khawmin Pathian rin chhan chungin ram tan hna a thawh dawn thu a sawi a, "MP fund mai bakah central aṭanga scheme leh project awmte kan ram tan a tam thei ang ber hai chhuah ka tum a ni," a ti.

Richard Vanlal-hmangaiha hi Kolasib bialtu MLA Lalfamkima leh ZPM hruaitute'n an ṭawiawm a, thuthar thehdarhtute an kawm zawhah Kolasib tlangdung khaw ṭhenkhat an fang nghal a ni.