BJP thawhpui lo tur thlang turin Congress hruaituin mipui a ngen

Mizoram Pradesh Youth Congress Committee (MPYCC) chuan March 30, Inrinni khan Chanmari kâwn, Aizawlah vantlang inkhawm an buatsaih a; thusawitu MPCC vice president Lalnunmawia Chuaungo chuan, MP atan BJP thawhpui lo tur thlang turin mipui a ngen.

Lalnunmawia Chuaungo chuan, state BJP hotu pakhat chuan MLA inthlan neih zawh tâkah BJP ṭanpuina pawisa dawng lo chu Congress party chiah a nih thu leh a pho chhuah dawn thu a sawi niin a sawi a, "Mizoram mipui tana him lo BJP thawhpui leh mai tur leh an thâ tichaktu tur MP nge kan thlan dawn, BJP thâ chhattu tur MP ngaihtuah nawn turin ka ngen a ni," a ti.

Lok Sabha inthlan turah BJP mangangin pawisak an nei lo tih sawiin Lalnunmawia chuan, "Mipui ngaihdan lâknaah BJP leh a thawhpuite dinhmun a hniam chak hle," a ti a; Indian National Develop­mental Inclusive Alliance (INDIA) tihchhiat nan BJP kaihhruai sorkarin Enforcement Directorate leh CBI thlengin hman­ruaah an hmang niin a sawi.

MPCC Vice President chuan, Delhi chief minister Arvind Kejriwal chu jail-a tàntir tumin man a ni tih sawiin, "Party dangin a ṭul lai taka sum an hman theih loh nan an account khawih chêt theih lohin an siam a, democracy a awm tawh lo. Khawvel ram dang US palaite leh UN hruaitute pawhin BJP sorkar chêt dan chuan inthlanna muanawm tak neih a ni lo palh ang tih an hlau hle a ni," a ti.

Congress party candidate Lalbiakzama pawhin thu sawiin, kum 2014-a BJP-in thuneihna an chan aṭangin Kristiante chunga hleilenna leh nêkchêpna a hluar niin a sawi a, "Kum 2014-ah Kristiante tiduhdahna vawi 147 a thleng a, nikum 2023 khan vawi 687 a thleng. Kristian tiduhdahtute hi police-in man ve bawk mah se, rei lo têah an chhuak a, jail aṭanga an chhuahin BJP MLA leh MP-te'n párṭhi nen an lo hmuak ṭhin," a ti.

Lalbiakzama chuan, BJP chuan ram pawn aṭanga ṭanpuina kohhran leh pawlin an dawn ṭhin an titawp vek tih sawiin, "Hnuchham enkawlna, damdawi-in leh zirna-in tam takin harsatna namenlo an tawk a ni," a ti a, BJP hmalakna titawp turin Mizo mipui an ṭan rual a ṭul thu a sawi.