LADC-ah sorkar ngêlnghet leh langtlang hun rei lo têah a din kan beisei - Lairam DPA

Lai Autonomous District Council (LADC) sorkarin buaina a tawh chungchangah Lairam Democratic Progressive Alliance (LDPA) chuan thuchhuah siamin, hun rei lo têah sorkar ngêlnghet leh langtlang, mipui sorkar din an inbeisei tih an tarlang.

LDPA chuan, LADC sorkar term kal laiah MNF-in seat awm zawng zawng - seat 25 zinga seat 20 an neih thu leh chief executive member (CEM) Manghmunga Chinzah kaihhruai sorkar an din thu an tarlang a, "MNF Legislature Party chhungah inphiarrûkna a awm avanga sorkar ding lai paih thlak a nih hnuah MNF Legislature Party Pu V Zirsanga kaihhruai sorkar din a ni," an ti.

LDPA tarlan danin, eirûk thubuaiah CEM ni lai V Zirsanga chu court-in thiam loh a chantir a, mahni inthiam lohna nei chung leh mipui zahna neia CEM aṭanga a bàn an beisei a; mahse, a bàn tâk mai loh avang leh MNF party aṭanga hmalakna a awm loh avangin party hrang hranga MDC 13-te chuan CEM-in thlâwptu a ngah tâwk lo tih Governor hnenah an thlen a ni.

LADC sorkar bûk (floor test) tura ruahman a nih laiin, CEM V Zirsanga chuan bànna a thehlut a, chutih laiin, LDPA lama MDC pakhat chu lehlamah a pên tâk vangin MDC 12 ve ve neiin sorkar a ding thei ta lo a, LADC thuneihna chu Governor-in a la ta a ni.

CEM-in a bàn hma leh thláwptu member a ngah tawh lo chungin hna nghet 20 dáwn lai a la tih tarlangin LDPA chuan, "Pawi kan ti tak zet. Hun rei lo têah sorkar nghêlnghet leh langtlang, mipui sorkar a din theih ngei kan beisei," an ti.