MP K Vena hi a duhâm vang nge? - ZPM Ṭhalai

ZPM Ṭhalai chuan thuchhuah siamin, K Vanlalvena Rajya Sabha MP ni chunga MLA candidate leh Lok Sabha MP candidate a ni duh chu a duhâm vang nge, Rajya Sabha chu engah vak a ngaih loh vang nge, tih chu an zawhna a nih thu an tarlang.

ZPM ṭhalaite chuan, "Kan state aiawha Rajya Sabha MP nia kum khat leh a chanve chuang hun a la neih laia MLA candidate-a aṭang leh kum khat chuang hun a la neih laia Lok Sabha MP candidate-a aṭang leh hrâm duh hian Rajya Sabha MP a nihna hi eng vakah a ngai lo nge, a duhâm vang zawk, tih hi kan zawhna a ni," an ti.

Hemi rual hian ZPM Ṭhalai chuan, Mizoram leh Assam sorkarin ramri chungchanga buaina leh harsatna an tawh laia sorkar laipuia Mizoram aiawha ding K Vanlalvena'n Mizo mipui thlavâng a hauh chu chhuanawm an tih thu an tarlang bawk.

ZPM Ṭhalai chuan, April 19, 2024-a Mizorama Lok Sabha inthlan turah ZPM candidate Richard Vanlalhmangaiha vote ṭheuh turin Mizoram mipui an ngen a; "Mizoram sorkarin kan state chhung hmasawn theihna tura ruahmanna a neih ang angte chak taka bawhzui a, kan state sorkar thâ tichak tura sorkar lai thawhpui thei tur, central sorkar dàwr kawnga ṭawng hman thuah pawh India ram chhunga zahpui awm lo ṭhalai viak ṭha kan nei hi kan chhuang tak zet," an ti.