Thlipui vangin chhiatna a thleng; pavalai khawmpui pandal a tlu sawp

Nimin zing dar 9 vel aṭanga Mizorama ruahsur nasa leh thlipui tleh vangin Mizoram hmun hrang hrangah in leh thil dang chhia eng emaw zat a awm a; Kohhran Pavalai Pawl (KPP)-in ram pum huap intawhkhawm an neihna tur pandal, East Lungdar khelmuala sak chu a tlu sawp.

Pandal hi February 2024 tàwp lamah sak zawh thawkhat a ni a, thual ṭhat leh chei mawi chiah hmabak a awm tawh. Nimin zing ruahsur leh thlipui tleh avangin a tlu sawp a, nimin khan senghawi hnatlang neih nghal a ni.

East Lungdar VC kaihhruaina hnuaiah kohhran leh pawl hrang hrangte chu nimin tlai khan an ṭhukhawm a, a hmun ngaiah pandal sak ṭhat leh an rel nia thu dawn a ni.

KPP ram pum huap intawhkhawm hi April 12-13, 2024 chhunga neih tur a ni a, pandal chim ta chu mi 4,600 vel lenna tura sak a ni.

Thu dawn danin, nimin zinga thlipui tlehin Lungtan khuaa Mizoram UPC kohhran biak-in a chhém thlu a; Sialsuk Hmunchung Presbyterian Kohhran biak-in chung pawh zing dar 9:30 vel khan thlipuiin a la bawk. Biak-in pahnihah hian nimin khan inkhawm theih a ni lo.

Heng bakah hian, Mizoram hmun hrang hrangah thlipui tlehin thil tihchhiat a nei nual nia thu dawn a ni a, vawiin lamah chiang zawka hriat theih beisei a ni.