IMI 2.0 thawh hnihna kalpui dan tur sawiho

Lunglei District Task Force for Immunization chu tun hnai khan DC conference hall-ah Lung­lei additional DC R Vanrengpuia kaihhruai­in an ṭhukhawm a; India ram puma naupang kum hnih hnuai lam leh nau pâi nute'n hri danna (vaccine) an dawn kim theihna tura hmalakna, Intensified Mission Indradhanush (IMI) 2.0 thawh hnihna Lunglei district-a kalpui dan tur an sawiho.

R Vanrengpuia chuan, Health & Family Welfare department-a thawktute thawhrimna leh inpekna fakawm a tih thu sawiin, "Hriselna hi ram hmasawnna bul leh in­nghahna a nih avangin ṭha­hnemngai taka hmalak chhunzawm zel a ngai a, Lunglei district-ah tlawhpawh zung zung harsa deuh awm mah se, hri danna la turte'n kim taka an lâk vek theih nan kan ṭan tlan a pawimawh," a ti.

IMI 2.0 thawh hnihnaah hian January 2020 chhungin Bunghmun Primary Health Centre (PHC) hnuaia khaw pali, Lungsen PHC hnuaia khaw paruk leh Tlabung Sub District Hospital hnuaia khaw 23 tuam tum a ni a; a vaiin khaw 34-ah naupang kum hnih hnuai lam 167  leh nu nau pai 37 hnenah hri danna pek vek an tum. Lunglei district immunization officer Dr Lalrinthangi chuan, IMI 2.0 thawh khatna, December 2019-a neih zawh takah naupang kum hnih hnuai lam mi 188-te hri danna pek tum a nih laiin, mi 185 (98%) pek an nih thu a sawi a; nu nau pai 45 pek tum a nih laiin, nu 51 pek niin, target aia tam an pe a ni.

Dr Lalrinthangi chuan Universal Immunization Programme hnuaia Lunglei district-a hmalakna sawiin, India ram puma zenghri danna beihpui thlakna Intensified Pulse Polio Immunization (IPPI) chu chak taka kalpui zel a nih thu leh IPPI chu Lunglei district-ah January 23, 2020-ah neih leh tum a nih thu a sawi. Zenghri danna hi Lunglei district-a naupang kum nga hnuai lam 13,708 hnenah pek tum a ni a, damdawi pekna tur booth 218 ruahman a ni.

Lunglei District Task Force for Immunization meeting-ah hian a kaihhnawih sorkar department hotu te, tlawmngai pawl aiawhte leh khawtlang hruaitute an tel.