Kawrpuichhuaha ICP atana hmalakna Minister Dr R Lalthangliana'n a enfiah

Commerce & Indus­tries minister Dr R Lalthangliana chuan nimin khan India leh Bangladesh insumdawn tawnna hmun tur, Kawrpuichhuaha  Integrated Check Post (ICP) hmalakna kal mek a enfiah.

Dr R Lalthangliana hi Lunglei HPC vice chairman Lawmawma Tochhawng, Lunglei South bialtu MLA Dr K Pachhunga, bialtu MLA Nihar Kanti Chakma, Commerce & Industries director J Hming­thanmawia leh sorkar official dangte'n an ṭawiawm a; Tlabung leh Kawrpuichhuah inkar kawng siamṭhat leh zauh hna thawk mektu ABCI Infrastructures Pvt. Ltd. leh hna viltu Mizoram PWD thawktute nen hmalakna kal mek leh hmachhawpte an sawiho.

Tlabung-Kawrpui­chhuah kawng siam mek chu km. 11.85-a thui niin, double lane National Highway standard-a laih zauh leh siam mek a ni a; World Bank sum hmanga siam niin, September 2016-ah thawh ṭan a ni. Project cost chu cheng vbc. 83 a ni a; ABCI project manager RK Singh sawi danin, hna thawh tur zinga 74.77% thawh a ni tawh a, culvert siam ngai 98% zawh a ni tawh bawk.

Dr R Lalthangliana chuan, Tlabung-Kawr­pui­chhuah kawng chu Kawrpuichhuah ICP tipuitling turin a pawimawh tak zet tih sawiin, contractor leh PWD-te chu an hna uluk leh ṭhahnemngai taka kalpui tur leh, hun tiama zo hman ngei turin a chah.

Kawrpuichhuah ICP atan hian kum 2005 khan Rites Ltd.-in Ministry of Home Affairs-ah survey report an thehlut a, ICP dinna turin ram bigha 224.99-a zau hauh a ni. India leh Bangladesh inkalpawhna tiawlsam turin Kawrpuilui (Theka)-ah RCC double lane bridge siam tum a ni a, lei siamna turin Mizoram PWD chuan Ministry of External Affairs-ah January 17, 2020 khan cheng vbc. 230.01 hû detail project report (DPR) an thehlut a ni.