ZPM-in MP inthlan campaign bul an ṭan; Delhi-ah zawmpui kan nei lo - Duhoma

ZPM chuan nimin khan Vanapa Hall-ah Lok Sabha MP inthlan lo awm tura campaign bulṭan inkhawm an buatsaih a, ZPM hruaitu Lalduhoma, chief minister chuan an party chu Delhi-a zawmpui nei lo an nih thu a sawi.

Lalduhoma chuan Delhi tlanga zawmpui an nei lo chu ZPM danglamna a nih thu sawiin, "Issue based-in Parliament thurel pawh a thlawpin a thlawp lo mai dawn a, hei hi kan tan chuan a him ber a ni. Central nena ṭha taka thawh dun hi kan duh a, amaherawhchu kan ram, kan hnam leh sakhaw tana him lo thilah chuan huai takin kan dodal mai dawn a ni," a ti.

ZPM chu tualṭo party an nih avangin tuna an dinhmunah hian an chiang tih sawiin Lalduhoma chuan, "He kan dinhmun hi chiang taka min hriatsak turin mipute pawh ka ngen duh. MP hi palai hna thawktu tur a ni a, a tirtu Mizoram sorkar nena thawk dun thei a ni dawn a, project um zui ngai a tam hle ṭhin," a ti a, project ṭha bawhzui turin MP ṭha kan mamawh thu a sawi.

Lalduhoma chuan Zofate hmun hrang hrangah kan inzar darh nasa ta hle tih sawiin, "Hengte enkawl thei tur hian MP ṭha kan mamawh em em. Ṭawng lama harsatna nei lo MP, hnamdang kara lo khawsa reng tawh leh hre em em mai MP candidate kan nei hian hmasawnna kawng tinrengah nasa takin kan tangkaipui ngeiin ka ring. Kan ramin a mamawh tak MP min thlantlin sak turin mipuite ka sawm a ni," a ti.

ZPM candidate Richard Vanlalhmangaiha pawhin thu sawiin, "Zoram mipui hian ZPM hi enchhin min tum loa, en tak tak min tum a ni. Mipuiten min beisei anga hna pawh kan thawh ngei ngei a ngai a, kan ram enkawl hna hi Pathianin kan kutah a dah," a ti a, malsawm tlaka kan ram enkawl kan tum tur a nih thu a sawi.

ZPM Candidate chuan MP-te chu central leh state inkar palai tur an nih thu sawiin, "Pathian zara ka lo tling a nih chuan he hna hi rinawm tak leh ṭha taka thawh ka tum a ni. Central aṭanga project leh scheme hrang hrang a tam thei ang ber hai chhuah kan tum dawn. Pawisa hi dik taka hman atan chuan central hian a ui reng reng lo," a ti.

Prime Minister emaw, Chief Minister emaw thu ni lovin Pathian thu ka ngai pawimawh dawn tih sawiin Richard-a chuan, "Pathian thu ang zelin ka kal dawn a ni. House chhungah a ni emaw House pawnah a ni emaw kan ram, kan hnam leh kan sakhua tan theihtawp ka chhuah dawn," a ti a, a thisen far tawp ṭhak thlenga a ṭan tur thu a sawi.