Democracy chhanna rally buatsaih

MPCC Campaign Committee chuan nimin khan Israel Point, Aizawlah 'India Ram Democracy Chhanna Rally' an buatsaih a, MPCC vice president Lalnunmawia Chuaungo-i'n thu a sawi.Lalnunmawia Chuaungo chuan India ram democracy chhanchhuah a ngai tih sawiin, "Keini pawhin tihtur kan nei ve, MP pakhat kan thlang ve dawn a, BJP dodal thei tur Congress candidate Pu Lalbiakzama kan thlan a ngai. BJP leh a thawhpuite rorel dan kan hria, a hrechiangtu chu kan missionary-te leh kan kohhran hruaitute an ni," a ti.MPCC Vice President chuan BJP sorkar hnuaiah inthlan ralmuang leh dik taka neih a ni thei tawh lo hial dawn tih sawiin, "Tunah hian MP inthlan hi dik lo taka hmachhawn pui min tum mek," a ti a, India ram mipuite laka firfiak taka Hindu nihna chawinun tumtu RSS leh VHP-te leh an political party BJP-te Hindu tam zawkin an duh loh thu a sawi.Narendra Modi sorkar chu campaign laia an auhla ber ṭhalaite tana hna siam leh ram pawna ṭhalai thawnchhuahah an hlawhchham ṭhak nia sawiin MPCC Vice President chuan, "India ram ṭhalai 65% hi hna nei lo an ni mek a, sawi pawh an sawi ri ngam tawh lo. Ṭhalai hna nei lote BJP sorkar lakah hian an beidawng em em a ni," a ti.Lalnunmawia chuan India rama BJP kaihhruai NDA paihthla theitu chu INDIA Bock-te an nih thu sawiin, "BJP-in an dinhmun an hre tawh a, chuvangin dik taka kan inthlan chuan an chak dawn lo tih an hria a, tunah hian Congress chakna tichhiat an tum mek," a ti a, Congress sum leh pai neih pawh Income Tax department hmangin an bei mek niin a sawi.MPCC Vice President sawi danin, BJP kaihhruai sorkar chuan Congress Party account 11 chu khawih chet theih lohin an hreng mek a, sum tam tak an chhuh sak bawk. Hetia an tih chhan chu Congress Party hian sum an neih loh chuan an campaign thei dawn loa, campaign thei loa min siam an tum.
Thusawitu dang Mahila president Vanlalawmpuii Chawngthu chuan BJP leh a sangawizawnpui NDA-te hi kan ram leh hnam, kan sakhua humhim nan kan paithlak a ngai tawh tih sawiin, "Democracy ram, India ramah hian democracy chu a bo mek a, rah behin a lo awm ta. A ram mipuite kan rum mek a ni," a ti.
Vanlalawmpuii chuan kan sakhua a zalen tawh lo tih sawiin, "Hnam hnuaihnungte rahbehin kan awm mek a ni. BJP leh a thawhpuite hian Hindu lal ramah min siam an tuma, ṭan an la mek a ni. Mipuite'n kan ngaihtuah chian a, kan harh a ngai," a ti a, an party candidate vote vek turin mipuite a sawm.
Zoram Decentralisation Front (ZDF) president Lawmthang pawhin thu sawiin, "BJP-te hnuaiah sakhua tihbik neihna chuan India ram a tuam ta mup mup mai. BJP-te leh a thurualpuite intelkhawmna NDA support tur MP kan thlantlin chuan kan luchungah meiling kan chhekkhawl tihna a ni ang. A chhan chu BJP support tur MP (LS) candidate te chu BJP, MNF leh ZPM-te an ni," a ti.