MP ka nih chuan union minister ka ni dawn - Vanlalhmuaka

BJP, Mizoram president Vanlalhmuaka chuan, Lok Sabha MP atan thlan tlin a nih chuan sorkar laipuiah minister a nih dawn thu a sawi a, Mizoramin central minister a neih theih nan amah vote turin mipui a ngen.

Vanlalhmuaka hian nimin khan Aizawl Press Club-ah thuthar thehdarhtute kawmin, a dinhmun leh MP a nih huna hmalak a tum dante a sawi a; "Pu Modi kaihhruai sorkar thar piang turah Mizoramin union minister kan neih ngei theihna turin i vote hlu tak hmanga BJP candidate hi min vote turin ka sawm che u a ni," a ti.

India hmarchhak state-a BJP state president zingah amah chiah MP candidate a nih thu sawiin Vanlalhmuaka chuan, "Kristian state zingah Kristian pachal Lok Sabha MP candidate awmchhun ka ni a, Mizoram mipuiin min thlang tling a nih chuan Pu Modi sorkar thar piang turah hian Mizo pa ngei central/union minister neih theihna chance kan nei tlat," a ti a; tun anga Mizoramin central minister a neih theihna chance ṭha a awm khàt tawh tur thu a sawi.

Mizoram BJP President chuan, chief minister Lalduhoma leh minister dangte'n central sorkara hotute zuk dawr mah se, an hlawhtling lo nia sawiin, "A chhan nia lang chu state chhunga inthlanah BJP chu archuk tui lo khawpin kan sawichhia a, kan bei a, BJP inhlauhsiakna leh induh lohsiakna thlarau hmangin vote kan zawn vang a ni," a ti.

MNF chungchang sawiin Vanlalhmuaka chuan, "NDA member MNF hian NDA neitu BJP chu a chhung lam aṭanga do an tum thu hmangin vote an zawng mek," a ti a; ZPM chu NDA zawm duh deuh reuh, zawm thei chiah si lo, BJP kaihhruai sorkar chakna ring tho sia tui lai rapa kal ngaihna vak hre lo an nih thu a sawi.

Congress party chungchang sawiin Hmuaka chuan, "An manifesto ber chu rem leh rem loa Hindu leh BJP sawi zawma BJP beih a ni. MLA election awm leh hunah chuan an bum mek Mizo mipui hian an dâwt sawi hi an chiang lehzual tawh ang," a ti.

Vanlalhmuaka chuan, kumin February thlaa Delhi-a BJP hoin inkhawmpui an hmannaah, Mizoramin BJP MP an thlan tlin chuan Mizoram hmasawnna tur pek an nih dawn thu an lo tiam niin a sawi a, "Lok Sabha MP ni ta ila, Mizoram mipui leh state sorkar mek pawh hian kawng tinréngin kan hlâwkpui ber ka ring," a ti bawk.

BJP PRESIDENT-IN A THIL TUM A SAWITE
* ZMC hi regional institute of medical science-ah hlang kai turin hmalak nghal a ni ang.
* Mizoram health infrastructure thuam ṭhatna atan special package cheng vbc. 500 aia tlem lo state sorkarah hman turin kan hui lut ang.
* Mizoram hi education hub-a siam turin School Education leh Higher Education thuam ṭhatna atan leh zirlai harsate ṭanpuina atan central aṭangin cheng vbc. 1,000 Special Fund for Development of Education in Mizoram atan bul ṭan nan ka hai chhuak ang.
* Mizorama loneitute chhinchhiahna atan PM Samman Kisan Nidhi hmangin kum tin Rs 6,000 ṭanpuina pek mek hi a dawng tur dik takte'n a hun taka an dawn theih nan hmalak a ni ang.
* Mizo ṭhalaite tan hnathawh tur tam zawk kan state chhungah kan siamna turin cheng vbc. 22,500 state sorkar ṭanpui nan hman turin buatsaih a ni ang. Mizo ṭhalaite ram pawna hna thawk tura thawn chhuah lam aiin, kal tualcharah ngei eizawnna hna siamsak an ni ang.