MP chak leh huaisen Mizoramin kan mamawh - MNF Adviser

MNF adviser Robert Romawia Royte, MLA chuan nimin khan Lawngtlaia an party office-ah thu sawiin, "Mizoramin MP chak leh huaisen kan mamawh," a ti.

Robert Romawia chuan Parliament House chhung leh pawnah pawh tribal, hnam tlem zawkte leh Kristiante huai taka ṭan tlat ngamtu K Vanlalvena, Mizoram aiawh MP atan chuan a ṭha ber nia sawiin, "Party party sawi loin Pu K Vanlalvena hi mipui MP ni turin i vote tlang ang u," a ti a, K Vanlalvena chu MP atana enchhin chawp ngai tawh lo, a ṭha tih hriat sa a nih thu a sawi.

MNF Adviser chuan tunlaia India rama thil thleng hrang hrang avangin MP chak leh huaisen kan mamawh tih sawiin, "Kan candidate hi a tlin chuan hmarchhaka party lian -NPP (Meghalaya), NDPP leh NPF (Nagaland) leh AGP (Assam) te nen huai takin kan hnam leh sakhua tana ṭha lote hi inthurualin an do dawn. MP candidate dangte aiin tling ngei tura mipui beisei mek Pu K Vena vote hi a fuh ber a ni," a ti.

LADC sorkar suspend ngaia a awm chu pawi a tih thu sawiin Robert Romawia chuan, "LADC-ah sorkar nghet tak a din leh thuai theihna atan MNF chuan plan A,B,C thlengin a nei.MDC 24 awmnaah MNF-in MDC 19 nei mahila MDC-te thawhho theih loh avangin LADC sorkar suspend a ni," a ti a, MNF Gen Hqrs chuan MNF MDC zawng zawngte zaikhata luang turin a duhin, a beisei thu a sawi.