College zirlaite tan debate huaihawt

Aizawl City College Joint Students Union (ACCJSU) chuan nimin khan Chanmari YMA Hall-ah leilung leh a chhunga awmte humhalh inzirtirna atana Debate Competition hmáwrbàwkna an buatsaih a, MJA presi-dent C Lalrambuatsaiha'n a hmanpui.

Debate Competition hi ACCJSU-in Environment, Forest and Climate Change department bultuma an buatsaih a ni a; MJA President chuan, hnam changkang apiangin leilung leh a chhunga awmte humhalh pawimawhzia an hre chiang tih sawiin, "Kan chhehvela awm nungchate humhalha venhim hi kan tih tur a ni tih ṭhalaite'n i hria ang u," a ti.

C Lalrambuatsaiha chuan, Mizoram a insingsa mek tih sawiin, "Zoram hi Pathianin eng emaw atan min buatsaih a ni. Hmasawnnain min nuai mek a, environment a chhiat nasat loh nan ngaihtuahna kan sen a ngai a, ṭhalaiten kan ngaihven a ngai. Hmasawnna nasa zawk a la rawn thleng zel dawn a, chumi atan chuan ṭhalaite kan lo inher rem a ngai," a ti a; thing tereuhtê tê phun aiin, thing lian tawh phun a ṭha zawka a hriat thu a sawi.

MJA President chuan, Mizo ṭhalaite central service-a lut pha tura an ṭan a ngaih thu sawiin, "Kan state-a hna lian zawng zawng hi hnam dangin an luah zo vek mai ang tih a hlauhawm, kan vei a ngai," a tia; Mizorama hmasawnna thar lo lut zel turah hna lian leh ṭha zawkte thawk thei tura inbuatsaih turin Mizo ṭhalaite a chah bawk.

Debate Competition final-ah hian Aizawla college hrang hrang zirlaite an inel a ni.