Transport dept.-in an mante pawisa chawi tlingkhawm cheng nuai 120.20

Sorkar kum kalta (2023-2024) chhung khan Transport department hnuaia Aizawl Enforcement staff-ten dan bawhchhia an man lirthei khalhtu/neitute sum chawi tlingkhawm chu cheng nuai 120.20 a ni.

April 2023 aṭanga March 2024 chhung khan lirthei 3,092 vel dan bawhchhia mante sum an chawi tir a, e-challan a chawi mi 35 an awm. Dan bawhchhia an man, an sum chawi tur ang la chawi lo mi 1,000 chuang an la awm a, e-challan a lock an nei nual bawk. Pawisa chawi tawh zat tling khawm chu cheng nuai 120.20 niin, an dawn kim hunah sorkar kum liamta-a pawisa chawi tlingkhawm hi a la

pung dawn.

e-challan lock tih hi, lirthei dan bawhchhia, enforcement staff hotu duty-naa ding duh loa tlan tlang emaw, a hmuna chawi nghal tur nei lote an registration tihtawp sak lailawkna a ni.

Dan bawhchhiatna zingah tax an chawi hun tura chawi lo, an certificate thi tawh leh insurance thi a tam ber tih Transport department hotute hian an sawi a, "Lirthei neitu nawlpuiin tax pek an ngaihsak lo ṭhin hle," an ti.

Transport department hotute sawi danin, sumdawnna atan hman lirthei hoin dan an zawm tur an zawm loh avangin lirtheite hi manin sumfai an chawitir ṭhin. Chutihrualin, dan ang diak diaka sum an chawi dawn chuan an chawi tur hi a san lutuk avangin a na lo thei ang berin an hrem ṭhin.