MLA-te'n chhawmdawl hna an thawk thei Sorkarin a tih tur a ti dawn - DMR Minister; Sangau khuaah rial a tla nasa

Disaster Management & Rehabilitation (DMR) minister K Sapdanga chuan, tun hnaia ruah leh thlipui vanga chhiatna thleng chu pawi a tih thu sawiin, "Sorkarin a tih tur a ti dawn," a ti a; Model Code of Conduct hman mek ni mah se, MLA-te tan chhawmdawl hna thawh theih a nih thu a sawi.

Thuthar thehdarhtute'n an kawmnaah K Sapdanga chuan, vanduaina tâwk chhungte an tawrhpui tak zet thu sawiin, "Sorkar aṭanga a tih theih ang ang danin a phal chinah ti turin kan inbuatsaih. MLA-te an bialah an tlân lut sung sung a, ṭhenkhatin Model Code of Conduct-in min phuar si a, silpauline takngial pawh sem a rem dawn em ni an ti deuh," a ti.

DMR Minister chuan, Election department hotute an biak thu sawiin, "Kan Chief Minister pawhin Election Commission of India hotute a bia a, kan harsatna a thlen nghal. Anni lam pawhin min hrethiam," a ti a; MLA-te chu chhawmdawlna hna thawk tur chuan inthlahrung lo tura hriattir an nih tawh thu a sawi.

State Disaster Relief Fund (SDRF) district tinah an dah thu sawiin Sapdanga chuan, "Thliin a tihchhiatte hi rangva in chhia a ni tlangpui a, rangva hmang vêka thawm ṭha turin kan inbuatsaih. A rang thei ang bera sorkarin a tih theih chin ti turin office lam chu kan inpeih viau," a ti.

DMR Minister chuan, thlipui leh ruahpui thawk leh thei reng a nih thu sawiin, a theih ang anga fimkhur turin mipui a chah bawk.

Hetih lai hian, nimin tlai dar 3 vel khan Sangau khuaa rial a tla nsa hle a, in chung rângvâ eng emaw zat leh thil dangte a déng chhia. Sangaua rial tla hi a tam hle a, Sangau bazarah chuan kawngpuiah rial a tlin khawm nasat avangin lirthei a tlan thei lo a, excavator hmanga thenfai a ni.

Rial hian mimal leh sorkar in chung rangva eng emaw zat a déng chhia a, nunphung a tibuai hle a, mihring thi leh hliam erawh an awm lo.