END-in thla thum chhungin Heroin kg. 18.570 an man

Excise & Narcotics department (END) chuan kumin 2024-a thla thum chhung, January 1 - March 31 inkar khan heroin kg. 18.570 an man a, rakzu leh sapzu litre 20,956.12 an man.

END chuan April 1, Thawhṭanni tlai dar 4 khan Chaltlang Lily Veng (State Guest House bul)-ah heroin gram 11 (hawng 1) leh a neitua puh Lalmuankima (32) s/o Thanzama, Durtlang Leitana khawsa nia inchhál an man. An chhui zuina kal zelah Thawhṭanni zan dar 11:55 khan Hunthar Vengah heroin gram 109 (hawng 10) leh methamphetamine kg. 5.888 (mûm 60,000) an man leh.

Hunthar Venga heroin leh methamphetamine an man kaihhnawihah hian mi parthum - KC Thangmawii (44) d/o Jacob, Zokhawthar, Lalthanpari (54) d/o Semmanga (L), Falam, Myanmar (Hunthar Venga khawsa mek) leh Tluangthanpari (39) d/o Hrawthleithang, Falam, Myanmar (Bawngkawn Brigade-a khawsa mek) nia inchhálte an man a ni.

END-IN RUIHHLO AN MANTE

(January-March 2024)

No. Ruihhlo Man zat

1. Rakzu lt. 16,829.035

2. Sapzu lt. 4,127.085 (ûm 7,534)

3. Zu bilh lai ṭin 31,064

4. BEDC (Burma zu) lt. 508.700

5. Beer lt. 3,180.500 (úm/búr 6,345)

6. Heroin kg. 18.570

7. Ganja kg. 381.076

8. Methamphetamine kg. 106.648

9. Khuh damdawi Phial 4,739