Inthlan kaihhnawihah criminal case awm lo

Aizawl SP Rahul Alwal chuan nimin khan SP Conference Hall-ah thuthar thehdarhtute thingpui a inpui a; Lok Sabha inthlanpui awm tur leh nikuma Assembly General Election kaihhnawihah criminal case a awm loh thu a sawi.

SP Rahul Alwal chuan Lok Sabha inthlan kaihhnawihah criminal case a awm leh awm loh zawhna chhángin, "Lok Sabha inthlan tur leh nikuma Assembly inthlanpui kaihhnawihah Mizoramah criminal case a awm lo. Mizoramah inthlanna muanawm tak a awm ṭhin a, a lawmawm tak zet," a ti.

Aizawl SP chuan, Lok Sabha inthlan turah Aizawl district bikah critical polling station pali a awm thu a sawi a; chu'ngte chu hmun rálṭí leh pawikhawihna thlen ṭhinna hmun a nih vang ni loin, state ramri hnaiha awm an nih vanga critical polling station-a puan an nih thu a sawi.

Rahul Alwal chuan, tunlaiah cyber crime a hluar thu sawiin, "Cyber crime tuartu tam takin police-ah an thlen lo," a ti. Police station emawa kal kher loin National Cyber Crime Reporting Portal (cybercrime.nic.in)-ah online hmanga report theih a nih thu sawiin, harsatna tâwkte chu report ṭhin turin a chah a, "Cyber crime chungchangah theihtawp kan chhuah dawn," a ti.

Mizoram chu ruihhloin a rùn mek thu sawiin Aizawl SP chuan, "Ruihhlo donaa tih tur tam tak a awm a, awareness (mipui zirtir) tih nasat a ngai. Ruihhlo ṭhat lohzia naupangte zirtir nasat a ngai a, nu leh patre pawhin an hriat chian a ngai," a ti a; ruihhlo chungchanga hriat neite chu police hnena thlen ṭhin turin a chah.

Aizawl SP Rahul Alwal hian chanchinbumite chu thawhpuiah a sáwm a, police-te hmalakna leh sualna chi hrang hrang donaah finchhuah ṭhin turin a ngen a ni.