Kristian nuai chimih duhtute leh sakhaw tih bik nei lote inbeihna a ni - Lal Thanzara

Mizoram Pradesh Congress Committee (MPCC) president Lal Thanzara chuan, Lok Sabha inthlanpui awm tur chu Kristiante nuai chimih duhtute leh sakhaw tih bik nei lote inbeihna tur niin a sawi.

Lal Thanzara hian nimin khan Lunglei Press Club-ah thuthar thehdarhtute a kâwm a, "MP inthlan lo awm tur hi Kristian nuai chimih duhtute leh sakhaw tih bik nei lote inbeihna tur a ni. Chutiang a nih laia MNF candidate-in a tling a nih chuan Kristian leh hnam hnufual zawkte nuai chimih duhtu NDA lamah ṭhut a tum thu a sawi hi Pathian tana seng khawmtu ni loin thehdarhtu a nih mai a hlauhawm," a ti.

MPCC President chuan, "Congress MP candidate kan thlan tlin chuan opposition-ah awm palh pawh ni se, Kristian state kan nihna anga Kristian nèk chêp tumtu dodal ngam MP kan thlan avang ringawt pawhin khawvel hmuhah kan mawi dawn a ni," a ti a; ZPM candidate pawhin tling ta se, a ṭhutna lam tur a sawi ngam lo a, sakhaw puithiamte rilru a tiná niin a sawi.