Bawrhsapin ráltlân lut tharte a enfiah

Lunglei district bawrhsap Ramdinliani chuan April 1, Thawhṭanni khan Khawmawi a tlawh a, tun hnaia Paletwa township, Chin state, Myanmar aṭanga ráltlana rawn lut Khumi mi 85-te dinhmun a enfiah.

Bawrhsap hi Lunglei SP, Additional DC leh YMA Sub-Headquarters Lunglei hruaitute'n an ṭawiawm a, Khawmawi VC leh YMA hruaitute'n an lo dawngsawng. DC chuan, ráltlânte chu ram dang mi an nih angin India khua leh tuite chanvo nei angte an nei ve theih vek lo tih a sawi a; sorkar, VC leh YMA-te'n inkaihhruaihna an siamte ṭha taka zâwm turin a hrilh.

Ramdinliani chuan, India sorkarin Myanmar aṭanga ráltlânte pawm loh mah se, Mizoram sorkarin mihring mihrinna rilru (humanitarian ground) avangin ráltlânte a lo tuamhlâwm thu a sawi a; raltlante chu a bika ruahman camp-ah an awm tur a ni tih sawiin, "VC-te hriatpuina tel loin an duh duhin an zin kualin an pém kual tur a ni lo," a ti.

Lunglei DC hian ráltlân lut tharte awmna tur in sakna tur hmunhma a en nghal a, an chenna tur sakna atan VC hnenah tarpauline eng emaw zat a pek bakah, tui lâkna tur pipe a rang lama ngaihtuahsak an nih tur thu a sawi.

Bawrhsap hian Lok Sabha inthlan tura Khawmawi polling station - Khawmawi Primary School a endik nghal bawk.