Lok Sabha inthlan atan inbuatsaih mek

April 19, 2024-a Mizorama Lok Sabha inthlanpui neih tur atan ngawrh taka inbuatsaih mek zel a ni a; tunlai hian inthlan buaipuitute tan training chi hrang hrang kalpui ṭhin a ni.

Lungleiah chuan nimin khan DC Conference Hall-ah sector officer atana ruat thar mi pariatte an hriat tur leh tih tur pawimawhte hrilhfiahna hun hman a ni a, electronic voting machine chungchangahte pawh zirtir nghal an ni. Lunglei district atan sector officer 28 ruat niin, March 12 khan training neihpui an ni tawh a; tun hnaiah sector officer pariat ruat belh niin, Lok Sabha inthlanpuiah Lunglei district bikah sector officer 36 an awm dawn ta a ni.

Nimin vêk khan Mizoram tana general observer Dr Nipun Vinayak, IAS hoin Siaha district-a polling official-te duty-na tur thliarna (randomisation of poling official) thawh hnihna neih a ni.

Polling official-te duty-na tur thliarna hi biakhmuhna kaltlangin general observer Dr Nipun Vinayak-a'n a kaihruai a; Siaha district election officer leh bawrhsap VL Hruaizela Khiangte hoin mawhphurtu pawimawhte chu Siaha DC Mini Conference Room aṭangin an tel.

Champhaia GM Higher Secondary School-ah nimin khan inthlana duty tur polling official-te tan training thawh khatna buatsaih a ni a, district election officer James Lalrinchhana'n hmanpuiin, polling official-te chu uluk taka thlan an nih thu a sawi.

Champhai DEO chuan, polling official-te chu ruihhlo leh a kaihhnawih laka fihlîm tur leh inthlahdah lo turin a chah a, "Dan palzûtna a awm chuan kan enliam mai mai dawn lo a, an chungah a tul anga hmalak zel a ni ang," a ti. Webcasting hmangin polling station-a chêt velnate uluk takin ECI-in a vil dawn thu leh chetsual palh a awm loh nan tih tur leh tih loh turte hriat a pawimawh thu sawiin, vote thlaknaa duty turte chu mock poll (vote thlak chhinna) aṭanga fimkhur taka bul ṭan turin a chah.

Champhai district-ah hian Assembly bial pathum awmin, polling station 84 a awm a; polling official 440 ruat an ni a, chungte chu - presiding officer, polling officer-I, polling officer-II leh polling officer-III niin, mi 110 ṭheuh ruat an ni. Tun ṭum inthlan turah hian Champhai district-ah voter 57,454 an awm a, mipa 28,018 leh hmeichhia 29,436 an ni.

Nimin khan Khawzawl DC Meeting Hall-ah MP candidate-te sum sên vil dan tur zirhona buatsaih a ni a, candidate-te additional expenditure agent-te leh accounting team member-te an tel. Additional DC Lalfakzuala leh assistant expenditure observer Lalrinpuia ten candidate-te senso vil dan tur an zirtir a ni.

Khawzawl district-a polling official-te an duty-na tur hmun thliarna hun nimin khan biakhmuhna kaltlangin general observer Dr Nipun Vinayak kaihhruaiin neih a ni a, Khawzawl aṭangin DEO K Lalrohlua leh election officia-te an tel.

Khawzawl district-ah hian Assembly constituency pakhat - Tuichang bial chauh a awm a, polling station 28 a awm. Polling station pali chu hmeichhe hlangin an enkawl tur, pink polling station a ni dawn a, polling station pakhat chu ṭhalai rual (All Youth Manage Polling Station) a ni bawk ang.

Hnahthialah pawh nimin khan DC Meeting Hall-ah DEO Chuauhnuna hoin booth level officer (BLO)-te ṭhutkhawmpui an ni a; BLO-te chuan an chan polling booth dinhmunte an sawi a, harsatna awm theite chinfel dan tur an sawiho.

Ṭhutkhawmah hian, mipuiin hrehawm ti loa vote an thlak theihna tura ruahman, assured minimum facilities (AMF) - tui, kawlphetha, daihlim leh ramp chungchang te, polling station 16-a webcasting tih dan turte leh pawimawh chi hrang hrangte sawiho a ni.

Hnahthial district SVEEP nodal officer K Ngosai chuan, MP thlannaah theihtawp chhuahpui tur te, vote thlak tura mipui sâwmna flyer an buatsaih chu thehdarhpui turtein BLO-te a ngen.

Hnahthial district-a election official-te chu nimin vek khan general observer Dr Nipun Vinayak-a'n biakhmuhna kaltlangin polling official-te kháwl hmanga thliar thawh hnihna a neihpui a; Hnahthial district aṭangin DEO Chuauhnuna, Election officer Lalbiakfela leh SDC Betty Lalrinfeli te an tel. Hnahthial district-ah hian South Tuipui constituency chiah a awm a, polling station 27 awmin, reserve team nen polling team 32 din a ni.