Rajasthan leh Odisha din champha Governor hoin Aizawlah lawm a ni

Nimin khan Raj Bhavan-ah Governor Hari Babu Kambhampati hoin Rajasthan leh Odisha din champha lawm a ni.

India ramah ‘Ek Bharat, Shreshtha Bharat’ kalpui a ni a, chumi ang chuan India rama state leh union territory-te din champha chu an state chauh ni lo, state dangahte pawh lawm a ni ṭhin a, a tlangpuiin Governor hoin lawm ṭhin a ni. Mizoram State Day pawh state dangahte lawm a lo ni tawh.

‘Ek Bharat, Shreshtha Bharat’ hnuaiah hian Mizoram Raj Bhavan-ah pawh India rama state dangte din champha lawm a lo ni tawh ṭhin a; nimin khan Rajasthan leh Odisha din champha lawmna hun hman leh a ni. Rajasthan Foundation Day chu March 30, 1949 a ni a, Odisha Foundation Day chu April 1, 1936 a ni thung.

Mizoram Raj Bhavan-a state dangte din champha lawmnaah hian an lawm state mi leh sa Mizoram/Aizawla awmte an tel ṭhin a, hnam làm leh zaite an entir ṭhin bakah, Mizo hnam làm pawh entir ṭhin a ni.