Solar energy siam dan zirho

Power & Electricity (P&E) minister R Lalzirliana chuan nimin khan P&E Engineer-in-Chief pisaah in chung (roof)-a solar energy siam dan zirhona a hawng. He hunah hian, Mizoram hmun hrang hrangah in chunga solar plant bun tura hmalak thawh hnihna bul ṭan a ni dawn a, chenna in (residential area)-a kalpui tur niin, target power chu kilowatt 500 a ni.

R Lalzirliana chuan India sorkarin ni chakna, thli leh tuikhuah hmanga power siam chhuah a ngai pawimawh tih sawiin, "A bik takin Ni chakna hmanga power siam chhuah tumin nasa takin ṭan a la a ni. Ruahtui tamna Mizoram angah chuan State dang ṭhenkhatte angin Solar Power hi chhawr tangkai viau thei lo mahila, kawlphetha mamawhna engemaw chen a phuhru thei ang," a ti.

Sorkar thuchhuah tarlan danin, sorkar laipuiin ni zung chakna (solar energy) hmanga kawlphetha siam chhuahna lamah, kum 2022-ah chuan in chunga dah chi (roof solar) hmanga megawatt 40,000 neih theih a inbeisei a; Mizoramah chuan P&E department-in a kalpui ang.