Mizoram MP candidate zingah Lalbiakzama, INC a hausa ber

Mizoram Lok Sabha MP candidate mi paruk zingah Indian National Congress (INC) candidate Lalbiakzama a hausa ber a, independent candidate Lalhriatrenga Chhangte a hausa lo ber.

Mizoram MP candidate zinga hausa ber Lalbiakzama (64) h/o Laldingliani hi MPS officer a ni a, Mizoram sorkara secretary a nih laia pension-a chhuak a ni. A rosum neih belh khawm chu Rs 3,84,20,000 hû a ni a, chu'ng zinga Rs 1,04,20,000 chu khawih sawn theih niin, Rs 2,80,00,000 hû chu khawih sawn theih loh a ni. Pawisa fai Rs 10,000 a kawl a, bank hrang hrangah Rs 86,30,000 a nei a; Rs 17,80,000 hu Creta car a nei bawk.

Candidate zinga rosum nei tlem ber Lalhriatrenga Chhangte (59), independent candidate-in rosum a neih zawng zawng chu Rs 6,75,000 hû a ni. Pawisa fai Rs 50,000 a kawl a, bank-ah Rs 1,20,000 a nei a, car Rs 5,00,000 hu leh inneih zungbun Rs 5,000 hû a nei bawk. Lak sawn theih loh rosum a nei lo a, a nupuiin lak sawn theih loh rosum Rs 1,65,00,000 hû a nei thung.

MNF candidate K Vanlalvena (54) h/o H Lalhuapzauvi chuan rosum Rs 1,82,36,347 hû a nei a, khawih chet theih Rs 58,36,347 leh khawih sawn theih loh Rs 1,24,00,000 hû a ni. K Vanlalvena hian pawisa fai Rs 13,00,000 a kawl a; bank account pangaah Rs 35,96,367 a nei a, Rs 9,40,000 hû car leh bike a nei bawk.

ZPM candidate Richard Vanlalhmangaiha (45) chuan rosum Rs 1,67,74,434 hû a nei a, lak sawn theih Rs 97,74,434 hû leh lak sawn theih loh Rs 70,00,000 hû a ni. Richard-a hian pawisa fai Rs 30,000 a nei a, bank account pali-ah 92,94,434 a nei a, Rs 2,50,000 hu car a nei bawk a; lak sawn theih rosum a neih zawng zawng chu Rs 97,74,434 a ni.

BJP candidate Vanlalhmuaka (53)-in Rs 11,30,075.19 a nei a, chu'ngte chu kuta a kawl Rs 10,00,000 leh bank account-a mi Rs 1,03,075.19 a ni a; rosum dang - lâk sawn theih leh lâk sawn theih loh a nei lo.

PC party candidate Rita Malsawmi (49) chuan rosum Rs 16,60,000 a nei a, lak sawn theih vek niin, lak sawn theih loh rosum a nei lo. Lak sawn theih rosum a neihte chu - pawisa fai kuta kawl Rs 10,000, bank ccount-ah Rs 1,00,000, Rs 2,50,000 hû Access scooter, rangkachak Rs 3,00,000 hû leh thil dang Rs 10,00,000 hû a ni.